شەفەق نیوز/ وێڵ سمیت، ئه‌كته‌ر ناودیار هۆڵیوود، ک لە شه‌و 27\28 ئادار جۊر خاسترین ئه‌كته‌ر پیاو خه‌ڵات ئۆسكار 2022 وه‌رگرد، له‌ مەوقەی وەڕیەوچگن ریوڕه‌سمه‌گه‌، چەپاڵەیگ له‌ بنگوش كریس رۆك دا، ك ئه‌كته‌ر كۆمێدییه‌ و پێشكه‌شكار ئاهەنگەگە بۊ. 

وێڵ سمیت لە هەشمار فەرمی خوەی لە ئینستاگرام، داوای وەخشین لە کریس رۆک کرد و وت "تونوتیژی لە گشت فۆڕمەیلی ژەهراوی و وێرانکەرە، رەفتار من لە شەو بەشەوکردن خەڵاتەیل ئۆسکار قبوڵ نەکریاگە و هۊچ پۆزشیگ نییە.

هەنەکی وە من بەشیگە لە کارەیلم، باوجی نەتۊەنستم لە ئاست هەنەکی وە بیماری جادا ئارام بگرم، هەس و سۆزم وەبان کاردانەوەگەم زاڵ بۊ". 

ویڵ سمیت وتیش: "من خوازم وە ئاشکەرا داوای وەخشین لە تو بکەم، کریس، هەڵەبۊم و سنوور رەدکردم، شەرمەزارم و کردەوەیلم دەرخەر ئەو کەسایەتیە نیە ک توام نیشانی بیەم، هۊچ شۊنیگ نییە ئەرا تونوتیژی لە دنیای دوسداشتن و میهرەبانی". 

لە کۆتایی نۊسینەگەی وێڵ سمیت ئۊشێد "توام داوای وەخشین لە ئەکادیمیا و وەرهەمهێنەرەیل نمایشەگە و گشت ئامادەبۊیەیل و گشت بینەرەیل جەهان بکەم، من فرە پەشیمانم لەو رەفتارە ک ئەنجامی دام بۊ وە لەکەیگ لەو گەشتە رەنگینەی گشتمان بەشداری لەلی کردیمنە".