شەفەق نیوز- ئەڵگەردان تایبەت

مۆبایل کۆمپانیای ئەپڵ ئەمریکی "ئایفۆن 18" دەس کرد وە دەرکەفتن لە بازاڕەیل تاران پایتەخت ئیران، سەرەڕای ئەو کۆت و بەنەیلە کە چەسپیاگەسە بان هاوردەکردنی وە شیوەیگ بازرگانی و نەوین دەرفەت ئەرا تومارکردنی وە شیوەیگ فەرمی لە سیستەم "هەمتا".

 وەپەی راپۆرتیگ ئەرا ئاژانس فارس ئیرانی کە ئاژانس شەفەق نیوز ئەڵگەردانی گرد، رەسین مۆبایلەگە ئەرا بازاڕ ئیرانی لە وەختیگ تیەێد کە کەناڵەیل هاوردەکردن فەرمی ئەرا تەلەفۆنە دەسییەیل لە ئیمارات رویوەڕوی کۆت و بەنەیل بوونەو، دۊای ئەو وەرەونواچگنە دۊایینەیلە لە ناوچەی کەنداو و گرژییەیل لە ناوەین ئیران و وڵاتە یەکگرتگەیل.

 وەپەی راپۆرتەگە، هاوردەکردن بازرگانی ئەرا مۆبایل ئایفۆن 18 لە ئیران قەیەغە کریەێد، و لە وەختیگ هیچ کۆت و بەنیگ نییە لەبان هاوردەکردنی لەلایەن گەشتیارەیلەو وەپەی ئەو رێکارەیلە کە لە ئیران کار وەپیان کریەێد، وەلی وەردەسبۊن مۆبایلەگە لە بازاڕەیل وە بڕیگ وەرچەو نشان پشت بەسین بازاڕەگە وە کەناڵەیل دابینکردنیگ دەێد کە لە هاوردەکردن بازرگانی فەرمی رەد کەن.

 راپۆرتەگە دیاری کرد کە زنجیرەی دابینکردن تەلەفۆنەگە لە دوبەی و شارجەوە دەس وەپی کەێد، وەرجە ئەوەگ وە ری ئاسمانی لەڕی رێڕەوەیل ترانزێتەو بڕەسێد ئەرا هەرێم کوردستان عراق، و بارەیل لە هەردگ شار سلێمانی و هەولێر گردەو کریەن، دۊاتر لەناو پاکەتەیل بۊچگ لەڕی ناوچە سنوورییەیل لە بانە و مەریوان ئەرا ناو ئیران بریەن، تا رەسنە تاران.

 راپۆرتەگە هۊردەکارییەیل پیشکەش نەکرد لەباوەت بڕ ئەو بارەیلە کە رەسینەسە بازاڕ ئیرانی یا شمارەی ئامێرەیل ئایفۆن 18 کە رەسن.

 راپۆرتەگە وتیش کە بڕ گشتی خەرجکردن لەبان هاوردەکردن جۊرە جیاوازەیل تەلەفۆنەیل ئایفۆن ئەرا ئیران مەزەنە کریەێد وە کەمتر نەوود لە 300 ملیۆن دۆلار، بی ئەوەگ ئەو ماوەی وەختە دیاری بکەێد کە ئی مەزەنە پشت وەقی بەسێد یا ئەو لایەنە کە ئامادەی کردگە.

 یەیش لە وەختیگ تیەێد کە سەرکردایەتی ناوەندی ئەمریکی (سێنتکۆم) قسە کرد لەباوەت وەرەونواچگنەیلیگ پەیوەندیدار وە دەریاوانی و جۊلەی دەریایی لە کەنداو، وەلی راپۆرتەگە بەڵگەیل پیشکەش نەکرد کە پەیوەندی بوەسێد لە ناوەین ئەو وەرەونواچگنەیلە و رێڕەوەیل هاوردن تەلەفۆنەیل ئایفۆن ئەرا ئیران.