شەفەق نیوز - وەدویاچگن
پۆلیس شار فیلادلفیا لە ویلایەت پەنسلڤانیای ئەمریکی راگەیان، کە مۆدێلیگ لە زیرەکی دەستکرد خەوەردان دروویگ لەباوەت تاوان کوشتن کلکردگە لەڕی ماڵپەڕیگ ئەلیکترۆنی تایبەت وە پۆلیس لە تەمموز/ یۆلیۆی گوزەشتە، لە رویداویگ کە وە یەکەمین رویداو ناسریاگ لە جۊر خوەی هەژمار کریا کە گومان کریەێد بریکاریگ لە زیرەکی دەسکرد تەقەلا داۊد خەوەردان دروویگ کل بکەێد ئەرا دەسەڵاتدارەیل.
پۆلیس وت کە کۆمپانیای "ئەنسرۆپیک"، گەشەپیدەر مۆدێلەگە، رووژ جمعە لە رویداوەگە خەوەرداری کردگە، و دیاری کرد کە خەوەردانەگە لە وەخت پرۆسەیگ تاقیکردن میکانزمیگ کل کریاگە، پۆلیس رەخنە لە دویاکەفتن ئاشکراکردن رویداوەگە و خەوەردان لەلی ئەرا ماوەی نزیکەی دوو مانگ گرۆ، و ئی دواکەفتنە وە کاریگ قبووڵنەکریاگ وەسف کرد.
وەپەی قسەی پۆلیس، خەوەردانەگە لە 18ی تەمموز/ یۆلیۆ رەسیە، و ئەوە لەخوەی گردۊ کە کلکەرەگەی شایەت زانیاری لەباوەت دۆسیەی کوشتنەگە داشتگە، و لە دەق پەیامەگە هاتۊد: «شایەت زانیاری بیاشتام لەباوەت ئی دۆسیە، لە هۊرمە کە کەسیگ دیمە هاوشیوەی ئی وەسفە لە دەورگرد ناوچەگە لەو ماوە، تکایە پەیوەندی وەپیم بکەن ئەگەر ئی زانیارییە پەیوەندی وەپیەو دیرێد».
ئی رویداوە لە وەختیگ تیەێد کە گرنگیدان و نیگەرانییەیل لەباوەت توانای سیستمەیل زیرەکی دەسکرد روی لە زیایبۊنە، وە تایبەت ئەو بریکارەیلە کە توانای جیوەجیکردن کارەیل لەڕی ئینتەرنێتەو دیرن، لە سای راپۆرتەیل لەباوەت وەکارهاوردن ئی سیستمەیلە لە بەزانن توڕەیل کۆمپیوتەری تایبەت و هوشدارییداین لە رخەیل ئەگەری کە شایەت لە پەرەسەنینیان دروس بوود.
لە ئەیلول/ سێپتەمبەر گوزەشتە، کۆمپانیای "ئۆپن ئەی ئای"، هاوماڵیکەر "ئەنسرۆپیک"، داوای وەخشین کرد، دۊای بەزانن دەروازەی داتای تەندروسی ئوسترالی وە دەس بریکاریگ لە زیرەکی دەسکرد، لە رویداویگ کە باسی کریا وە یەکەمین رویداو ناسریاگ کە بریکاریگ لەی جۊرە ماڵپەڕیگ ئەلیکترۆنی حکومی ئەرا بەرژەوەنی خوەی وەکار بارێد.
رویداوەیل وەرین ترەک وەکارهاوردن کەلێنەیل لە سیستەمە لاوازەیل یا رەسین ئەرا سەکوویەیل ریوەپینەیریای لەلایەن بریکارەیل زیرەکی دەسکرد لەخوەی گرد ئەرا پەیوەندیکردن لە ناوەین خوەیان، وەلی رویداو فیلادلفیا پرسیارەیل زیاتر زنەو کەێد لەباوەت چۊنیەتی رەفتارکردن ئی سیستەمەیلە وەرد ماڵپەڕە فەرمییەیل، و رێکارەیل چەودیاری ئەرا ریگریکردن لە کلکردن زانیاری چەواشەکار ئەرا دەسەڵاتدارەیل.