له به‌ياننامه‌یگ حكوومه‌ت هه‌رێم ئه‌را (شه‌فه‌ق نيوز)، ئه‌وه ده‌ركه‌فت ك دويه‌كه يه‌كشه‌ممه، ئارام ئه‌حمه‌د محه‌مه‌د وه‌زير كاروبار شه‌هيده‌يل و ئه‌نفالكرياگه‌يل له حكوومه‌ت هه‌رێم كوردستان له ديوان وزاره‌ته‌گه له هه‌ولێر پيشوازی له عه‌بدولخالق قادر كردگه ك برای عسمه‌ت قادرعه‌زيزه‌و يه‌كيگ له‌و ١٨ دويه‌ته‌سه ك له‌وه‌خت ئه‌نفالكردن كلكريا ئه‌را مسر.
له به‌ياننامه‌گه يه‌يش ده‌ركه‌فت ك له‌و ديداره باس له‌و ١٨ دويه‌ت و ژنه‌يله كرياگه ك ئيسه باسيان كريه‌يد ك گوايا له‌وه‌خت ئه‌نفال به‌دناو كلكرينه ئه‌را وڵات مسرو هه‌ر له‌وه‌ر ئه‌وه‌يش وه‌زير كاروبار شه‌هيده‌يل قه‌وڵ ئه‌وه دا چه‌وديری مه‌سه‌له‌گه‌يان بكا وه‌خاتر ره‌سين وه راس و دروسی ئی مه‌سه‌له وه‌شيوه‌يگ جددی.
جی باسه، دويای رميان رژيم وه‌رين عراق له ساڵ ٢٠٠٣، به‌ڵگه‌يگ ك ناو سيانی ئه‌و ١٨ دويه‌ته له‌تی بوی ك خه‌ڵك ناوچه‌ی گه‌رميانن له سلێمانی، ئه‌وه ده‌رخست ك ئه‌و دويه‌ته‌يله كلكريانه ئه‌را مسرو فرووشيانه‌سه يانه‌يل شه‌وانه‌ی ئه‌و وڵاته.
ج .أ