شەفەق نیوز ـ نینەوا
سەرچەوەیگ لە فەرماندەیەتی پۆلیس پارێزگای نینەوا، ئمڕوو شەممە، راگەیان مفرزەیگ سەر وە پۆلیس فریاکەفتن توەنست ژیان مناڵیگ شیرخوەر لە مردن وە دەس باوگی رزگار بکەێد.
سەرچەوەگە وە ئاژانس شەفەق نیوز وت، گەشتیەیل سەر وە بەش پۆلیسی فریاکەفتن (کەرت فریاکەفتن مەحلەبیە / حەمیدات) لە وەخت هەوەجەکریاگ رەسین توەنستن کۆنترۆل بارودۆخەگە بکەن و مناڵەگە رزگاربکەن، دویای ئەوەگ باوگی لە حاڵەت سەرخوەشی بوی، تەقەلای سەربڕین مناڵەگەی داوێد وە وەکارهاوردن ئامێریگ تیژ (چەقوو)، وە دڵنیایی لە سەلامەتی شیرخوارەگە کریا و رێکارە یاساییە پێویستەیل وەرانوەر تاوانبارەگە وەرگیرا.
لە لایەگتر، پلاتفۆرم و ماڵپەڕەیل تووڕە کۆمەڵایەتییەیل پارچە ڤیدیۆیگ بڵاوکریایە کە دەرکەفێد دوو ئەندام پۆلیس فریاکەفتن لە وەردەم گەشتیەگەیان نیشان دەێد و یەکیگان مناڵە شیرخوەرەگەی گردیەسە باوەش، کە لە ڤیدیۆگە باس لە وردەکارییەیل رویداوەگە و مەوقەی دەسوەردان خێرای ئەمنی کەن کە بوویە مدوو رزگارکردن ژیان مناڵەگە.