شه‌فه‌ق نيوز/ مه‌حما خه‌ليل عه‌لى ئاغا قايمقام قه‌زاى شه‌نگاڵ، حكومه‌ت ناوه‌ندى وه دريغيكه‌ر و كز تومه‌تبار كرد وه‌رانوه‌ر كرده‌وه‌يل خراوه‌كارى په‌يڕه‌وكرياێ ك له قه‌زاگه ئه‌نجام ئه‌گرێد له‌لايه‌ن هيزه‌يليگ ناوخوه‌يى و ده‌يشت عراق و ئاماژه وه وجوود ئه‌جنداى ئه‌مريكى، رووسى، توركى، ئيرانى و سوورى كرد ك كار له‌بان رێگرى له هاتنه‌وه‌ى ئاواره‌يل ئێزيدى ئه‌كه‌ن ئه‌را قه‌زاى شه‌نگاڵ.
قايمقام شه‌نگاڵ له به‌ياننامه‌يگ وت: وه‌ل گشت ئه‌و ئه‌جنداو ده‌زگايه‌يل هه‌واڵگيريه ك كيشمه‌كيش ئه‌كه‌ن له ناوچه‌گه، وه‌لێ حكومه‌ت و چاره‌سه‌ره‌يل عراقى وه ته‌مامى وجوود نه‌يرێد و گرنگى وه كه‌مينه‌يل و مه‌ينه‌تيه‌يليان نادريه‌ێد.
جى باسه، قايمقام شه‌نگاڵ هه‌ميش وت: حكومه‌ت عراقى وه‌گووره‌ى ياساو ده‌ستوور بايه‌سه له‌بانى ريگرى له كرده‌وه‌يل خراوكارى بكا له شه‌نگاڵ و جددى نيه له هاوردنه‌وه‌ى ئاواره‌يل و گرنگيداين وه ناوچه‌يليان و باسيش له‌وه كرد ك بايه‌س بوێ هيزه‌يل عراقى ته‌ماشاى هيزه‌يل پێشمه‌رگه بكرديان هه‌ناى ك ناحيه‌ى سنونى رزگار كرد له ساڵ 2014 و گشت ناوچه‌يلێ له مين و ته‌قه‌مه‌نى پاكه‌و كرد.