شەفەق نیوز/ ئاخوندیگ ئیرانی وەناو موحسین موجتەهد زادە، بوخت وە ئیسرائیل کرد کە تەقەلا دەێد ئیمام مەهدی لە عراق بکوشێد.

زادە لە پارچە ڤیدیۆیگ میدیای ئیرانی بڵاو کرد وت: ئیسرائیل تونێلیگ لە شار سامەڕای عراق کەنیە، تا بڕەسێدە تەرم ئیمام حەسەن عەسکەری باوگ ئیمام مەهدی، تا dna لەلی درارێد.

 زادە کە وەڕیەوبەر و دروسکەر (ناوەند هوکارەکردن خەتیبەیل ئاینی)ە لە ئەمریکای لاتینی، وت: ئیسرائیل تونێلیگ کەنیە تا بڕەسێدە قەور ئیمام حەسەن عەسکەری تا (دی ئێن ئەی) لەلی درارێد، تا وەوە بتوەنن ئیمام مەهدی پەیا بکەن و بکوشنەی.

وتیش: هەناێ ئەمریکا چگە ناو عراق، پرسیار لە چەن زانایگ ئاینی کردن لە شوین و نوین ئیمام مەهدی، و کامیرا لە گشت شوینیگ نانە تا پەیای بکەن و بکوشنەی.

دیاری کرد کە ئەو تاوەرەیلە کە لە شان مەنزڵگای ئیمام هادی و عەسکەری نریانە، نیشانگر لەبانیان نریاس، و وە زیرەکی دەسکرد کۆنتڕۆڵی کردنە، ئەوەیش ئەرا وەختیگ نریاس هەناێ ئیمام مەهدی دەرچوود، تا پەیای بکەن و بکوشنەی.