شفق نیوز- موسکۆ

ئاژانس "نۆڤۆستی" رووسی، ئمڕوو چوارشەممە، خەوەر دا لە کوشیان 17 هاووڵاتی رووسی لە دانشتگەیل ناوچەیل سیبیریا لە خوەرهەڵات، لە ئەنجام پەلامار خرسەیل قاوەیی لە ماوەی گوزەشتەی ئمساڵ.

لە نووترین  ئێ رویداوەیلە لە هەرێم کراسنۆیارسک لە خوەرهەڵات سیبیریا بوی، کە داربڕیگ تەمەن 39 ساڵان شەو 23 أيلول/سێپتێمبەر کەفتە وەر پەلامار خرسیگ لەناو ناوچەی دارستانەیل "یێبیشینسکۆی" لەنزیک ئاوای "پۆتابۆڤۆ"، وەپای داتایان وەڕێوەبەرایەتی لیژنەی لێکۆڵینەوە لە هەرێمەگە.

وەپای ئامارەیل، ناوچەیل سیبیریا   17 پەلامار کوشندەی خرسەیل  وەبان ئادەمیزاد لە وەرز ئیسە وەخوەی دییە، لە کوو گشتیان شەش حاڵەت مردن لە هەرێم کراسنۆیارسک، و سێ حاڵەت لە هەریەک لە پارێزگایەیل ئێرکۆتسک و تۆمسک، و یگ حاڵەت لە کۆمار ئاڵتای لە باشوور سیبیریا.

هەمیش بوریاتیا دوو حاڵەت مردن لە ئەنجام پەلامار خرسەیل تۆمار کرد، لە وەرانوەر یک حاڵەت لە نیمچە دوورگەی کامچاتکا، و یکێ ترەگ لە هەرێم خابارۆڤسک.

وەڕێوەبەرایەتی هەرێمیی لیژنەی لێکۆڵینەوە وشیاری دا کە مەنەن لەناو دارستانەیل لە وەخت ئیسە رخدارە، وەمدوو بەرزەوبوین  چالاکی خرسەیل.

لە هەمان باوەت، ئاژانس "تاس"ی رووسی لە زوان چەن سەرچەوەیگ بڵاو کرد کە خرسەیل لەی ساڵە لە دارستانەیل دەرهاتنە  و چگنەسە ناو ناوچەیل ئاوەدان لە 41 ناوچەی رووسی، لە وەختیگ خوەرهەڵات سیبیریا ئاڵۆزترین بارودۆخ وەخوەی دی،  نزیکەوبوین لە مەکتەوەیل و یەکەیل سەربازی و تاقیکردنەوەیان ئەرا چگنە ناو خێزانەیل تایبەت لە باکوور ناوچەگە.

هەمیش خرسەیل لە بڕیگ لە سەێرانگا وەناوبانگەیل گەشتوگوزاری لە هەرێم کراسنۆیارسک ئیسفاکریان، لەناویان پارێزراگ ژینگەیی "گریمیاتشیا گریڤا"، و لەنزیک پارێزراگ نیشتمانی "ئەستونەیل کراسنۆیارسک"، جیا لە ناوچەی گەشتوگوزاری "ئوداتشنی".

حاڵەت ئامادەباشی لە گشت زەویلەیل هەرێم ئێرکۆتسک راگەینریاس ، لە وەختیگ هێمان یاسای قەیەغەی هاتووچوی لە شار بایکالسک جیوەجی کریەێد.