شەفەق نیوز/ وەزیر پەیوەندیەگان لە هەرێم کوردستان، ئمڕوو دووشەممە، دووپات کرد ک وەزارەتەگەی باج نێەخەێدە بان کۆمپانیایل پەیوەندی و ئەنتەرنێت لە هەرێمەگە، بەڵکم بەغداد وەشیوەیگ ناعادیلانە ئەو باجەیلە وەرگرێد.
ئەنۆ جەوهەر عەبدۆکا ئەرا ئاژانس شەفەق نیوز وت: وەزارەتەگەی ١٨ کۆمپانیای موڵەتدار دیرێد، ئەو کۆمپانیایلە وەگورەی رێوشوێنەیل یاسایی باج خوەیان دەن، وەزارەتەگە هویچ دەسڵاتیگ لە وەخشینیان نەیرێد.
وتیش؛ وەزارەتەگە باج فروشتن نێەخەێدە بان کۆمپانیایلە، بەڵکم خەریک توێژینەوەیەگه‌ ک چوین ئی باجه‌ دانەێد ئەرا زیای کردن داهاتە حکومەتیەگان.
ولە باوەت کۆمپانیایل ( کۆڕەک و زێن و ئاسیا سیڵ) جەوهەر دیاری کرد؛ ک ئەو کۆمپانیایلە باج فروشتن خوەیان دەنە حکومەت فیدڕاڵی، ئەویش دویای بڕیاریگ لە حکومەتەگەی حەیدەر عبادی سەرۆک وەزیر وەرین له‌ ساڵ ٢٠١٥ .
عەبدۆکا وتیش؛ وەڕێژەی ٢٠% لەبان کارتەیل وەحدە دریەێدە حکومەت بەغداد ک یەیش وە کاریگ ناعادیلانە دانەیمنەی، ک پویلەیل باج فروشتن ٦ مەلیۆن بەشدار لە هەرێمەگە چوود ئەرا حکومەت عیراق، ک هویچ نیەدەێدە کوردستان.