له بروسكه‌ێ پیروزباییه‌گه‌ێ پارت دیموكرات كوردستان ، ئه‌ڕا یه‌كیه‌تی و كل كردن كوپیێگێ ئه‌ڕا شه‌فه‌ق نیوز ، هاتگه ، وه‌بوونه‌ێ یاد چل ساڵه‌ێ یه‌كیه‌تی نیشتمانی كوردستان ، پیروزبایی له سه‌ركردایه‌تی و ئه‌ندامه‌یل حزبه‌گه‌دان ئه‌كه‌یم و ئومیدواریم وه یه‌ك ده‌نگی و خه‌بات هاوبه‌ش و وه‌رگری كردن له خاك نیشتمان ، ما فه‌یل ڕه‌وای ملله‌ته‌گه‌مان وه‌ده‌س بیه‌ریم و گامه‌یلتر وه‌ره‌و ده‌سكه‌فته‌یلتر ئه‌ڵگریم.
له درێژه‌ێ به‌یاننامه‌گه هاتگه ، هه‌ریم كوردستان وه بارودوخێگ سه‌خت و چاره‌نویس ساز تێپه‌ر ئه‌دێ ، وه‌تایبه‌ت وه‌خاتر ئه‌و جه‌نگه ك تروریزم سه‌پانگه‌سه‌ێ بانی و هه‌ر وه‌ێ خاتره بایه‌د خه‌بات و ڕزه‌یلمان وه‌ل سه‌رجه‌م لاێه‌نه‌یل كوردستانی یه‌ك بخه‌یم ، ئه‌ڕا پاراستن ده‌سكه‌فته‌یل و وه‌رگری كردن له ئه‌زمون هه‌ریم و وه‌ده‌س هاوردن گشت ما فه‌یلێ.
ته‌ئكید كردگه ، ئه‌رك گشت لاێگمانه ك له‌ێ بارودوخ سه‌خته وه‌ئه‌وپه‌ر وه‌رپرسیاریه‌وه مامه‌ڵه وه‌ل پێشهاته‌گان بكه‌یم و ئومیدیش خواستگه ك ملله‌ت كورد له‌ێ جه‌نگ چاره‌نویس سازه سه‌ر بكه‌فێگ.
له كوتایی بروسكه‌گه‌ێ پارت دیموكرات كوردستان ، ئومید خوازریاگه ك ئێ یاده بدێده بوونه‌ێگ ئه‌ڕا بته‌و كردن په‌یوه‌ندی و یه‌كخستن ووتار سیاسی و بته‌و كردن برایه‌تی و ئاشتی له ناونی سه‌رجه‌م لاێه‌نه‌یل سیاسی له هه‌رێم كوردستان و وه‌ل به‌شه‌یلتر كوردستانیش ئه‌ڕا نه‌هیشتن ناكوكیه‌گان و چاره‌سه‌ر كردن كیشه‌گان.
یه‌كیه‌تی نیشتمانی كوردستان سوو یه‌ك حوزه‌یران وه‌بوونه‌ێ یاد چل ساڵه‌ێ دامه‌زراننێ ئاهه‌نگ ساز ئه‌كا.
ج ك