وه گووره‌ى به‌ياننامه‌ى حكومه‌ت هه‌رێم ك(شه‌فه‌ق نيوز)ئاگادارى بوى، ئه‌وه ده‌ركه‌فت ك له ديدار ناونى نه‌يچێروان بارزانى سه‌رۆك ئه‌نجومه‌ن وه‌زيره‌يل هه‌رێم كوردستان و شانديگ له يه‌كێتى ئۆرپا ك پيكهات له كريستوس ستايلياندس مفه‌وز سامى يه‌كێتيه‌گه ئه‌را كاروبار ئنسانى و ئداره‌كردن قه‌يرانه‌يل و جانا هايباسكوفا باڵوێز يه‌كێتى ئۆرپا له‌عراق و شانده‌يل ياوه‌ريان باس له پشتگيرى و هاوكارى هه‌رێم كرياگه وه‌ل هه‌وڵ وه‌ده‌سهاوردن و هانداين كومه‌ڵگاى ناوده‌وڵه‌تى وه‌خاتر ده‌سميه‌ت كوردستان وه شيوه‌يگ خاستر له‌وه‌ر كه‌مه‌وكردن مه‌ينه‌تيه‌يلى.
به‌ياننامه‌گه يه‌يش ده‌رخست ك شاند ميوان سوپاسگوزارى و ريز و حورمه‌ت خوه‌ى پيشكه‌ش كرده‌سه ملله‌ت و حكومه‌ت هه‌رێم كوردستان وه‌خاتر له‌خوه‌يگرتن ئه‌و شماره‌ى فريه‌ى په‌نابه‌ر و كووچبه‌ره‌يله وه‌ل پيشكه‌شكردن خاسترين خزمه‌تگوزارى ئه‌رايان.
جى باسه، له‌لايه‌ن خوه‌ييشه‌و سه‌رۆك حكومه‌ت هه‌رێم كوردستان خوه‌شاڵى خوه‌ى نيشاندا وه سه‌ردان شاند يه‌كێتى ئۆرپا ئه‌را هه‌رێم و داوا له‌ليان كرد بار هه‌رێم جوور خوه‌ى جيواز بكه‌ن ئه‌را لايه‌نه‌يل په‌يوه‌نديدار ئۆرپى و ناوده‌وڵه‌تى و وه‌رده‌وام بوون له پشتگيرى و ده‌سميه‌ت ملله‌ت و حكومه‌ت هه‌رێم وه‌خاتر وه‌هاناڕه‌سين په‌نابه‌ره‌يل و كووچبه‌ره‌يل وه شيوه‌يگ راسه‌وخۆ له‌ڕى ريكخرياگه‌يل ناوده‌وڵه‌تى و ناوچه‌يى له هه‌رێم.