شەفەق نیوز/ دوێەتیگ سوری ئاوارە، ئمڕوو چوارشەممە، لەوەر گولەی ویڵیگ مرد، ک لەدەس ئاهەنگکەرەیل جەژن نەورووز لە پارێزگای دهۆک دەرچگ.

سەرچەوەیگ لە تەندروسی دهۆک ئەرا ئاژانس شەفەق نیوز وت: ئیجان عەبدولمەلیک لە داڵگبوی ٢٠٠٦ ، شەوەکی ئمڕوو مرد، دویای زەخمداربوینی لە رووژ شەممەی گوزەیشتە لەناو کامپ دومێنز ئەرا ئاوارە سوریەکان هەنای گولەیگ داگە سەری.

وتیش؛ پزشکەیل بی توانا مەنن لە ڕزگارکردنی، لەوەر سەختی دەرکردن گولەگە لەناو زەخمەگەی سەری.

یەکیگ لە کەسەیل خیزانەگەی ئەرا ئاژانس شەفەق نیوز وت: دوێەتەگە داشت ئامادەکاری ئەرا ئاهەنگ نەورووز کرد، و وتە داڵگی ک خوەی خوازێد بچوودە بازاڕ ئەرا سەنین چشتەیل جەژن.

وتیش: وەلی لە مەوقەی دەرچگنی لە دەر ماڵەگە بویە تویش گولەی ویڵیگ، و کەفتە زەوی، و وەکوتپڕ بردیمنەی  ئەرا یەکیگ لە خەسەخانەیل دهۆک.

جی باسە ک خیزانەگەی ئیجان، لە ساڵ ٢٠١٢ لە شار دێریک لە سوریا پەنا وە هەرێم کوردستان بردن، و ئیسە هانە کامپ ئاوارەیی دومێز لە دهۆک.