شەفەق نیوز/ سەرچەوەیگ ئەمنی وەرپرس، ئمڕوو چوارشەممە، خەوەردا لە کوشیان دویەتیگ وە هوکار دەسکاریکردن چەک و خوەیکوشتن گەنجیگ لە بەغدای پایتەخت عراق.

سەرچەوەگە وە ئاژانس شەفەق نیوز وت، دویەتیگ لە داڵگبوی 2009 گیان لە دەسدایە وە هوکار دەسکاریکردن چەک لەناو ماڵ خوەیان لە ناوچەی سەبع بور لە خوەرهەڵات بەغدا.

سەرچەوەگە وتیش، دویەتەگە گولە وەر سەری کەفتیە راستەوخۆ گیان لە دەسدایە.

لە رویداویگتر  پیاویگ لە داڵگبوی 1995 خوەی کوشتیە لە ری تەقەکردن لە خوەی لە ری چەکیگ لە جویر (بمبەکشن) لەناو ماڵەگەی لە ناوچەی عەلاوی لەناوراس بەغدا.

سەرچەوەگە وتیش،  ناوچەی سەری کردیەسە ئامانج تەقەکردنەگەی، دیاریکرد هوکار خوەیکوشتنەگەی تا ئیسە نادیارە.

هەمیش، قسەکەر پۆلیس ئیدارەی گەرمیان موقەدەم ماڤپەروەر عەلی قەدوری راگەیان، تەرمەگە هن هاوڵاتیگە  وە ناو (ه.ع.ح) لە داڵگبوی 1985 دانشتگ ئاوای "باناسیاو" سەر وە ناحیەی "کولەجوو" ئەرا بەش فریاکەفتن خەستەخانەی شەهید هەژار لە قەزای کەلار کلکریایە، ک لەوەر تەقەکردن لە لەشی گیان لە دەسدایە.

 وەپای قسەی کەسوکار قوربانیەگە لەو ئاوایە پەروەردەی ماسی کردیە و وەگەرد هاوڵاتیەیلیگ بویەسە مەرافی ک هەمان خولیا دیرن لەئاوایەگە، دویاجار گولە نریاسە کەسە یەکەمەگە وکوشیایە.