شەفەق نیوز/ وەگورەی رووژنامەی ساڵانەی حکومەت هەرێم کوردستان،  رووژ چوارشەممەی ئایندە کەفێدە پشووی فەرمی لە گشت دامودەزگایەیل حکومەتی و ناحکومەتی، وەبوونەی سەرساڵ ئەیزیدی، یا ئەوەگ وە "چوارشەممەی سوور" ناسیاگە.  

چوارشەممەی سوور،  جەژن سەرساڵە لەلای ئیزیدیەیل،  و کەفێدە یەکەم چوارشەممە لە مانگ نیسان لە گشت ساڵیگە وەگورەی رووژنامەی خوەرهەڵاتی ک وە ١٣ رووژ کەفێدە دۊای رووژنامەی خوەرئاوایی. 

ئەیزیدیەیل لە شۊنەیل خوەیان لە سوریا و عراق و تورکیا و ناوچەیلیگ جیاجیا لە ئازەربایجان و ئەفغانستان و رووسیا و فرە لە دەوڵەتەیل ئەوروپا و ئەڵمانیا وەتایبەت ئاهەنگ وەی رووژە کەن.     

ئەرا  چوارشەممەی سوور وەپی ئۊشن؟ 

ئەیزیدیەیل ئۊشن ئی ناوە وەگورەی باوەڕیان هاتیە ک خوداگە خۊن داگە لەش "ئادەم" و گووشتەگەی تەواو بۊ و خۊن لە لەشی گەردی، و ژیان وەخشیە بان زەۊ، و گوڵە سوور لە شەوەکی رووژ چوارشەممە دەرچگ، ئەراوە ڕەنگاوڕەنگ خوەیان و ماڵەیلیان وەپی کەن، و وەپی ئۊشن گوڵ نیسان.