ڕێبەر ئەحمەد وەزیر ناوخۆ، لە کۆنگرەیگ رووژنامەوانی ئاژانس شەفەق نیوز ئامادەی بوی وت: ئی پڕۆسە هیلێد دەسمیەتی وە پەنابەرەیل لە هەرێم کوردستان پیشکەش بکریەێد، و ئەوەسا هاوکاری ئەرا زیاتر لە ١٠٠ هەزار کەس پیشکەش کەێد.

 وتیش: تا ئیسە ریکارەیل ئەرا گلەوخواردن پەنابەرەیل نەگونجیاگە، و ئومید خوازیمن دویای خاسەوبوین رەوشەیل وە بیوەیی گلەو بخوەن، و دووپات کرد ک حکومەت هەرێم کوردستان وەگشت توانای ئەرا پەنابەرەیل کار کەێد تا ئەوەنە هانە ناو هەرێم کوردستان.

زوور لەبان گرنگی ئەوە کرد ک پاڵپشتیکردن پەنابەرەیل لەبان تەنیا هەرێم کوردستان نەیلن، وتیش: هەرچەن عراق وڵاتیگ دەوڵەمەنە، وەلێ کەموکوڵی هەس، و وەزارەت کووچبەری عراق وە شیوەی وەرپرسانە رەفتار وەگەرد ئی باوەت لە هەرێم کوردستان نیەکەێد.

ڕێبەر ئەحمەد وتیش: حکومەت هەرێم کوردستان پشتگیریکردن گلەوخواردن ئاوارە و پەنابەرەیل وە ئارەزوو خوەیان کەێد، و هویچ بڕیاریگ وە گلەوخواردن ناچاری لەبان مەردمیگ نیەێد ک خوەیان دەسمیەتی خوازن.

پەیامنێر ئاژانسمان وت: بنکەگە لە ناوچەی بەحرەکە لە شار هەولێر واز کریا، و کۆمیسیۆن نەتەوە یەکگرتگەیل ئەرا کاروبار پەنابەرەیل و وەزرات ناوخوەیی لە حکومەت هەرێم کوردستان جیوەجیی کەن، وە سپۆنسەر سەندووق کوەیەتی، و بوودە بارەگایگ گشتگیر ئەرا خزمەتەیل توومارکردن و مقیەتیکردن، ک ری و  کۆمسیۆن دەێد بەیاننامە وەدەسیان بکەفێدر تا وەگورەی خوازینیان دەسمیەتییان بەێد.