شەفەق نیوز/ فەرمانبەرەیلیگ لە پارێزگای سلێمانی، ئمڕوو سێشەممە، دەسکردنە بایکۆتکردن دەوام فەرمی، چوینکە مووچە نەگردنە.
وەگەرد یەکەمین رووژ دەوام دویای هوچان جەژن رەمەزان، فەرمانبەرەیل شارەوانی سلێمانی دەس لەکار هەڵگردن.
سەردەشت رەفیق قسەکەر سەرۆکایەتی شارەوانی پارێزگای سلێمانی لە وتاریگ تایبەت وە ئاژانس شەفەق نیوز وت: فەرمانبەرەیل دەسکردنە بایکۆت چوینکە مووچە نەگردنە، و هەمیش لە ناڕەزایی لەبان ئەوە ک فرە لە داهاتەیل شارەوانی لەبان خزمەتگوزاری سلێمانی خەرج نیەکریەێد.
وتیش: فەرمانبەرەیل لە بایکۆت وەردەوامن تا مووچە وەرگردن.
فەرمانبەرەیل شارەوانی ئەویشن: مووچەی مانگ ئادار وەدەسیان نەڕەسیە، هەرچەن مانگ نیسانیش ها تەواوبوین.
لەوەر کەمی پویل لەناو بانکەیل سلێمانی، مووچەی مانگ ئادار تا ئیسە وە فەرمانبەرەیل و خانەنشینەیل خەرج نەکریاگە.