شەفەق نیوز - هەولێر
نرخ سەوزە و میوە رووژانەیل، لە بان گشتیان تەماتە و پیاز و پەتاتە و جویرە جویراوجویرەیل میوە، بەرزەوبوینیگ وەرچەو لە گشت هەرێم کوردستان تەنیا لە ماوەی 15 رووژ گوزەشتە وەخوەی دی.
ئەرا زانستن مدووەیل ئی بەرزەوبوینە، پەیامنێر ئاژانس شەفەق نیوز لە عەلوەی (بازاڕ جوملە) سەوزە و میوە لە شار هەولێر گلەردی، کە چەوی کەفتە بازرگان گەیلان هەرکی، خاوەن نویسینگەی شمارە 16 لە بازاڕەگە، کە ئەرا ئاژانسەگە دووپات کرد، "وە مدوو بەسانن سنوورەیل ئیران لە وەردەم هەناردەکردن سەوزە و میوە ئەرا عراق وە گشتی و هەرێم کوردستان وە تایبەتی، نرخ گشت ماددە سەرەکییە رووژانەیل، وەتایبەت تەماتە و پەتاتە و پیاز، رووژ دویای رووژ بەرزەوبوینیگ وەردەوام وەخوەی دوینێد".
هەرکی ئاشکراکرد "نرخ یەک کیلو تەماتە لە ماوەی گوزەشتە لە ناوەین 500 و 600 دینار بوی، باوجی ئیسە لەناو بازاڕ جوملە وە نرخیگ لە ناوەین 1200 و 1300 دینار فرووشیەێد، و وەختیگ رەسێدە دەس هاوڵاتیەیل لە بازاڕەیل بەرزەو بوود ئەرا 1500 دینار".
وتیش "پیازیش بەرزەوبوینیگ هاوشیوە وەخوەی دی، کە نرخ یەک کیلۆی وەرجە ئیسە لە ناوەین 400 و 500 دینار بوی تا وە 750 دینار برەسێدە دەس وەکاربەر، لە وەختیگ نرخ یەک کیلۆی ئیسە - وەتایبەت جۊرە خاسەیل - لە ناوەین 1300 و 1500 دینارە. هەمیش نرخ یەک کیلۆ پەتاتە لە ناوەین 1100 و 1500 دینار بویە، لە سای نەهاتن وەرز بەرهەم ناوخۆیی لە کوردستان تا ئیسە".
هەرکی مدوو سەرەکی لە بەرزەوبوین نرخەیل ئەرا پڕنەکردن هەوەجەیل رووژانەی هەرێم کوردستان لەلایەن بەرهەم ناوخۆییەو گلەودا، و دیاری کرد شار هەولێر وە تەنیا رووژانە هەوەجە وە نزیکەی 450 تا 500 تەن تەماتە، و زیاتر لە 25 تەن پەتاتە، و زیاتر لە 25 تەن پیاز دیرێد، کە لە ئیرانەو هاوردە کریان ئەرا پڕکردن کوڵهاوردن ناوخوەیی لە هەرێم و عراق، باوجی لایەن ئیرانی ئیسە رێ لە هاتنیان گرێد وە بیانووی بەشنەکردنیان ئەرا بازاڕ ناوخوەیی خوەی.
وتیش؛ ئەو تەماتەیە کە ئیسە رەسێدە هەولێر لە هەردوگ پارێزگای نەجەف و کەربەلاوە تێد، باوجی بڕەگەی بەش هەوەجەی گشتی عراق نیەکەێد، و تەنیا لە ساغکردن ئەوەگ ئیسە لە کۆگایل هەس مەنگە، کە ئەوەیش هەوەجە وە پەیاکردن چارەسەر جێگرەوە دیرێد.
هەرکی دووپات کرد، بازرگانەیل نیەتوەنن لە تورکیاوە هاوردە بکەن وە مدوو بەرزەوبوین فرەیگ تێچگ؛ کە تێچگ یەک بارهەڵگر (بار 40 تەنی) رەسێدە زیاتر لە 10 هەزار دۆلار تەنیا ئەرا گواستنەوە و رسومات گومرگییەگەی بی هەشمارکردن نرخ کاڵاگە، کە ئەوەیش تا ئیسە رێ لە پشتبەسانن وە ئی بژاردە گرێد.