شەفەق نیوز/ وەزارەت دارایی و ئابووری لە هەرێم کوردستان، ئمڕوو سێشەممە، راگەیان کە وەزارەت دارایی لە حکومەت فیدراڵی زیاتر لە 631 ملیار دینار کلکردیە ئەرا دابینکردن مووچەی مانگ تشرینی دویەم گوزەشتە.

 ئمڕوو وەزارەت دارایی کوردستان لە بەیاننامەیگ وت: وەزارەت دارایی عێراق تەنیا بڕ 631 ملیار و 335 ملیۆن دینار خستیەسە هەشمار لق هەولێر بانکی ناوەندی عراق ئەرا دابینکردن دارایی مووچەی مانگ 11ی فەرمانبەرەیل و ئەوانەگ مووچە وەرگرن لە حکومەت هەرێم کوردستان .

 شەوەکی ئمڕوو، حکومەت هەرێم کوردستان دەسکردن وە خەرجکردن مووچەی فەرمانبەرەیل و کارمەنەیل کەرت گشتی ئەرا مانگ تشرین یەکەم گوزەشتە ڕاگەیان.

 لە بەیاننامەیگ رەسیە ئاژانس شەفەق نیوز وت: “وە پشتبەسین وە بڕیار دوایین گردەوبوین ئەنجومەن وەزیرەیل لە هەرێم کوردستان، و وە پشتبەسین وە تەمەی مەسرور بارزانی، سەرۆک حکومەت هەرێم کوردستان، شاندیگ کوردی سەردان بەغداد کرد ئەرا دانوسەنین وەرد وەزارەت دارایی فیدراڵی  ئەرا چارەسەرکردن پرس مووچەی هەرێم”.

 وتیش: "بەشەوکردن مووچەی مانگ تشرین یەکەم لە رووظ سێشەممە 12/17 دەسوەپی کرد" و لە وەختیگ سەبر سەبر و ئارامیی فەرمانبەرەیل هەرێم کوردستانی بەرز نرخان، دووپاتیش کرد"وەهویچ شیوەیگ واز لە مافەیلیان نیاریمن".

شەوەکی رووژ یەکشەممە ١٥ی کانوون دویەم، شاندیگ وەزارەت دارایی و ئابووری لە هەرێم کوردستان رەسیە بەغدای پایتەخت، ئەرا دانوسەنین وەرد دەسەڵاتە فیدراڵییە پەیوەندیدارەیل لە پرس دویاکەفتن مووچەی ئەو سێ مانگە لە مانگ تشرینی یەکەم، مانگ تشرین دویەم، و مانگی کانوون دویەم ئەمساڵ.

 فەرمانبەرەیل و کارمەنەیل کەرت گشتی لە هەرێم کوردستان وەدەس رەوشەیل سەختی ژیانەو ناڵن لە ئەنجام دویاکەفتن مووچە و شایستەیل مانگانەیان لەوەر ئەوە بایکۆتکردن لە دەوام فەرمی لە سلێمانی دەسوەپی کرد.