شەفەق نیوز/ ئمڕوو یەکشەممە، عەبدوڵڵا ئۆجەلان، سەرۆک پارت کرێکاران کوردستان، دەسپشخەریی نوویگ پیشکەش کرد وە ئامانج پەیاکردن چارەسەر ئەرا پرس کورد لە سوریا، لە ری نامەیەگەو کە ئەرا سەرکردایەتی هیزەیل سوریای دیموکرات (هەسەدە) کلی کرد، لەناوی دیدگایگ پیشکەش کەێد ئەرا دەستوریگ دیموکراسی کە ئارامی لە ناوچەگە وەدەس بارێد.

 تولای ئۆگولاری هاوسەرۆک پارت “دیموکراسی و یەکسانی  گەل” تورکیا راگەیان کە ئۆجەلان نیاز دیرێد پێشنیاریگ هەمەلایەنە بخەێدە وەردەس ئەرا چارەسەرکردن پرس کورد نەک تەنیا لە سوریا، بەڵکم لە تورکیا و عراقیش، و ناوچەگەیش وە گشتی.

 ئۆگولاری ئاشکرا کرد کە دەسپیشخەرییەگە رووشنایی خەێدە بان پەیاکردن ریەچارەیگ یاسایی و دیموکراسی وەبی پەنابردن وە جەنگ چەکداری.

 وەگورەی ئەوەگ لەلایەن قسەکەر پارت کوردی تورکیا، عائیشە گولەو ئاشکرا کریاس، ئۆجەلان لە زیندانەگەی لە دوورگەی ئیمرالی تورکیا، پەیامیگ ئەرا سێ پارت سەرەکی (هەسەدە) لە باکوور خوەرهەڵات سوریا، سەرکردایەتی پارت کرێکاران کوردستان، لە کوێەی قەندیل لە چوارچیوەی هەرێم کوردستان عراق، و “کۆنگرەی نەتەوەیی کورد” لە ئەوروپا کلکردیە.

 وەگورەی میدیایل تورکیا، باوەت ئی پەیامانە ئاشکرا نەکریاس، بەڵام کەفنە چوارچیوەی تەقەلایل ئۆجەلان ئەرا پەیاکردن چارەسەر ئەرا پرس کورد.

وەگورەی ماڵپەڕ "وەپەلەی تورکیا"، بڕیاربوی ئۆجەلان داوا لە ئەندامەیل پەکەکە بکەێد واز لە چەک بارن، و حزبەگە هەڵوەشنن، یەیش لە کاردانەوەیگ ئەرا دەسپیشخەرییگ کە لە مانگ تشرین یەکەم گوزەشتە لەلایەن سەرۆک پارت بزووتنەوەی نەتەوەیی تورکیا، دەڤلێت باخچەلی دەسوەپی کرد، بەڵام تا ئیسە ئی گامە جیوەجی نەکریاس.

 لەو چوارچیوە، شاندیگ پارت دیموکراسی و یەکسانی گەلان، دوو گلە لە ٢٨ کانوون یەکەم و ٢٢ کانوون دویەم  سەردان ئۆجالان لە زیندان کرد، ئیجا شاندەگە لە ناوەین ١٦ تا ١٩ی شوبات چگە هەرێم کوردستان عراق، و باس لە هویردەکارییەیل دەسپیشخەرییەگە کرد، کە لە ژیر رووشنایی ئەو رەوشەیل ئاڵووزە لە سوریا و غەززە،  گرنگییگ زیاتر وەپی دریەێد.