شەفەق نیوز/ تیمەیل تایبەت لە وەڕیەوبەرایەتی ریوبان و پێەڵەیل لە پارێزگای هەولێر، ئمڕوو دووشەممە، دەسکردن وە ماڵین وەفر و خاسەوکردن ریوبانەیل سەرەکی، کە کەفتنە کاریگەری وەرفرەلویل دویایین، کە بویە هوکار بەسیان بەشیگ لە ریەیل، و پەکخستن هامشوو لە چەن ناوچەیگ.

 وەڕیەوبەرایەتیەگە لە بەیانامەیگ رەسیە ئاژانس شەفەق نیوز وت: تیمەیل دەسکردنە وازکردن ریەیل و ماڵین وەفر لە چەن رییگ سەرەکی لەناویان باليسان - زيناتير، زێنی - تاوسكا - قلاسنج - ریەیل سەفين، حوجران - قەڵاسنج - دربەند، و زيناتير - باليسان، ئەرا مسۆگەرکردن گونجیان جویلەی هاوڵاتیەیل.

لەلای خوەییش، پارێزگای هەولێر باس تەقەلایل وەردەوام ئەرا خاسەوکردن ئەو ریەیلە کرد کە زەرەدمەن بوینە، و دووپات لە گرنگی مقیەتبوین مەوقەی رانین کرد، وەتایبەت لەو ناوچەیل کوێیە کە هیمان وەفر لەبانیان کەڵەکە بویە.

 ناوچەیل فراوانیگ لە هەرێم کوردستان و عراق لەی رووژەیل گوزەشتە شەپوول سەردی جەمسەری وەخوەیان دین، وەگەرد وەفروارین خەسیگ، کە بڕیگ لە ریەیل بەسیان، و جویلەی هاتوچو بڕیا، وەتایبەت لە ناوچە کوێەیلە.

کوڵفتی وەفرەگە لە بەشیگ ناوچە رەسیە زیاتر لە 40 سم، کە هیشت لایەنەیل پەیوەندیدار بکەفنە ئامادەباشی ئەرا ماڵین وەفر و وازکردن ریوبانەیل ئەرا ئاسانکردن هامشوو مەردم و بیوەییان.

وەرجەیە، رووژ یەکشەممە، شارەزای کەشناسی عەلی جابر زیادی ئەرا ئاژانس شەفەق نیوز ئاشکرا کرد کە عراق چەوەڕی سەردترین شەپوول کەێد کە گشت ناوچەیل وڵاتەگە گرێدەو، و دووپات کرد کە پلەی گەرمی ئەرا خوار سفر داوەزێد.