رەندا محەمەد کە خانمیگ کورد سوریاس لەی مژارە کارکەێد وە ئاژانس شەفەق نیوز وت، " من خەڵک شار قامشلیم وەرجە چەن ساڵیگ هاتمەسە هەرێم کوردستان دەسکرمە وە کارکردن لە مژار دویرمان پرتال کوردی ژنانە دویرم وەگەرد نەخش و رازانەوەی.
وتیش "ئاشکەراس پرتال فلکلووری کوردی دیزاینەگەی جیاواز لە ناوچەیگەو ئەرا ناوچەیگ ترەک من چەن جویریگ لەی پرتاڵە دویرم کە خانمەیل پەسەنی کەن".
ئاشکەرایکرد "پیشوازیکردن گەپیگ هەس ئەرا پرتال فلکلووری کوردی، خانمە کوردەیل لە فرەی لە بوونە و جەژنەیل پووشنێ ئێ پیشوازیکردنە وە شیوەی وەرچەو بەرزەوبوود وەگەرد هاتن وەرز وەهار و جەژن نەوروز کە بەشیگە داب و نەریت کۆمەڵایەتی".
دیاریکرد، بەشداری لە بازاڕەیل ژنانە کردیە کە لە شار هەولێر کریانە، دووپاتکرد، "ئێ بازاڕەیلە گرنگە ئەرا گەشەداین وە پرۆژەیل خانمەیل و وازکردن دەریگ وە روی ئاسۆی نوویگ لە بوارەگەی".