عومەر لە ساڵ ١٩٦٣ لەداڵگبویە، هەر لە تەمەن نۆ ساڵیی، لە ساڵ ١٩٧٢ ئی کارە کەێد، و گشت شەوەکیانیگ دەسکەێدە گەردین.

عومەر لە قسەیلی ئەرا ئاژانس شەفەق نیوز وت: لە ساعەت هەفت شەوەکی کارەگەی دەسوەپی کەێد، و گەردێد ناو کویچەیل.

هەرچەن بڕیگ مەترسی لەیجویر کاریگ هەس، بەڵام عومەر رکدارە لەبانی تا تیکە نان خوەی و خانەوادەی شەش کەسانەی درارێد، ک ئویشێد: بڕیگ مەترسی لەی کارە هەس، ک بایەتە وریا بوێ ک شایەت ئەگەر هویرد لەلای خوەدەو نەوود، مەوقەی تیژکردن چەقوو جییگد بووڕێ.

 وتیش: وەلێ من رکدارم لەی پیشە کار بکەم، چوینکە کاریگتر نەیرم تا نان رووژانەی خیزانەگەم درارم، و نزیکەی دە ساعەت لە رووژیگ وەگەرد ئی پیشە گوزەران کەم، تا رووژانە لە ٦ هەزار تا ١٠ هەزار دینار دەرکەم، و جاروباریش فرە لەیە کەمتر.

 عومەر دیاری کرد ک تیژکردن وە چوار گام کریەێد، یەکەم جار چەقووەگە وەبان سەنگ مەورەی کارەبایی زبر کڕنێ، ئیجا وەبان هویردەگە، ئیجا لەوە هویدتر، ئیجا وەبان پارچەی کاغەز جام، ئیجا روینکردنی، تا رەسێدە هویردترین مەورە، تا بریقەی باێد.