شەفەق نیوز/ گەنجیگ کوشیا و دووان تر زەخمدار بۊین،  هەنای هێزەیل چەکدار ئیرانی لە نزیک مەرز کیلی ناوبەین ئیران و هەرێم کوردستان تەقە لەلیان کردن، وەگورەی ریخریاگ "هـەنگاو" ئمڕوو شەممە.  

ریخریایەگە لە بەیاننامەیگ ئمڕوو وت: ئیوارەی دۊیەکە جومعە،  هێزە چەکدارەیلە تەقە لە کاروان کووڵبەرەیل کردن و یەکیگیان کوشتن. 

بەیاننامەگە لە زوان سەرچەوەیگ لە شار بانە لەکوردستان ئیران ئاشکرای ناسنامەی قوربانیەگە کرد و وت ناوی مهران رەحمانیە و هالە تەمەن ٢٤ ساڵان.   

سەرچەوەگە وتیش: دوو کووڵبەریش زەخمدار بۊین، یەکیگیان خاڵو قوربانیەگەس وەناو ئیبراهیم رەحمانی لەنتەمەن ٤٥ ساڵان، و ئەوەکە خەڵک ناوچەی کیلە بۊی، وەناو هاوڕێ ئەحمەدی.

ریخریایەگە وتیش: ئەو دوو کوڵبەرە ک کەسوکار یەک بۊین، خەڵک ئاوای مانجیلان لە شار بانە بۊین، لە ری گلەوخواردن بۊین، و هۊچ باریگ وەپیان نەۊیە.