شەفەق نیوز/ بڕیار رەشید ئەندام ئەنجومەن نوینەرەیل لە پارێزگای سلێمانی، ئمڕوو چوارشەممە، وت: وەزارەت نەفت عراق نرخ یەک لەتر ئەو نەفتە ک ئەرا هەرێم کوردستان کلی کەێد وە ٥٠٠ دینار دیاری کرد.
رەشید لە قسەیلی ئەرا ئاژانس شەفەق نیوز وت: نرخ نەفت لە بەغداد ئەرا هەرێم کوردستان ٥٠٠ دینارە، و ئیمە تەقەلا دەیمن باریمنەی خوار تا مقەیەتی نرخ نەفت لە بازاڕ بکەیمن، و خوازیمن نرخ لەتریگی بڕەسنیمنە ١٥٠ دینار.
دیاری کرد، دویای شەش مانگ نوینەر حکومەت هەرێم کوردستان لە بەغداد یاداشتیگ ئەرا کۆمپانیای بەشەوکردن بەرهەمەیل نەفتی لە عراق لە رووژ ٩/١٠/٢٠٢٢ کلکرد، لەناوی داوای بڕ و نرخ ئەو نەفتە کرد ک ئەوەسا ئەرا پارێزگایل هەرێم کوردستان کلی کەێد، کۆمپانیاگە لە ١٦/١٠/٢٠٢٢ جواو یاداشتەگە دا وەبی سڵاکردن لە گردەوبوین دەسەیل وەزارەت نەفت، وتیش: نرخەگە ٧٥٠ دینارە، و یەیش راس نییە.
رەشید وتیش: ئی یاداشتە لە رووژ ١٨/١٠/٢٠٢٢ وەرگردن ک رووژ سێشەممەی گوزەشتە بوی، و وەکوتپڕ پەیوەندی وە وەزارەت نەفت کردیمن، و وەپیمان وتن نرخ و بڕەگە لەلایەن کۆمپانیای بەشەوکردن بەرهەمەیل نەفتی کلەو کریا، وەبی گلەوخواردن ئەرا بڕیارەیل دەسەی وەزارەتەگە، و نرخ یەک لەتر نەفت چەرمگ وەگورەی بڕیار وەزارەتەگە ٥٠٠ دینارە.
رەشید وتیش" دویای هەفگەیگ لە دانوسەنین وەرد وەزارەتەگە، دووارە ئەرا نرخ ٥٠٠ دینار گلەو خواردن، و داومان ئەوەسە ک نرخ یەک لەتر ١٥٠ دینار بوود، وەلێ وەزارەتەگە ئویشێد ٥٠٠ دینارە.