شەفەق نیوز - هەولێر

دیندار زێباری رێکخەر ئەرکە ناودەوڵەتییەیل لە حکومەت هەرێم کوردستان، رووژ یەکشەممە، هوشداری دا لە وەردەوامبۊن داننەنیان فەرمی لەلایەن حکومەت فیدراڵی وەو تاوانەیلە کە ریخریاگ "داعش" لە سەرانسەر عراق ئەنجامیان دا، وەتایبەت لە ناوچە کوردستانییە دابڕیاگەیل، وە دووپاتکردن ئەوە کە هەرێمەگە رویوەڕوی دەرئەنجامەیل ئەمنی رخبار بۊەسەو.

 زێباری، لە کۆنگرەیگ رووژنامەوانی کە پەیامنێر ئاژانس شەفەق نیوز ئامادەی بۊ، وت کە "لە ساڵ 2014ەو، وەختیگ ناوچە کوردستانییەیل دەیشت ئیدارەی هەرێم کەفتنە دەس تیرۆریستەیل داعش، رێکخستنەگە جۊرەها تاوان مرۆیی و جەنگی ئەنجام دا، جویر کوشتن وەیەگجاری و پرۆسە تیرۆریستییەیل و کۆمەڵکوژی (جینۆساید)، بیجگە لە دەروەدەرکردن هەزاران خیزان و بازرگانیکردن وە مرۆڤ و هووشبەرەیل".

 رووشنەو کرد کە "گشت ئی پیشێلکارییەیلە قەیرانیگ گەپ دروس کردن، کە هەوەجە بۊ لە حکومەت عراقی، لەوەرانوەری، دادگایگ تایبەتمەن دامەزرنێد ئەرا ناسانن ئەو تاوانەیلە لەناوخۆ و ناودەوڵەتی، بیجگە لە دادگاییکردن سەرکردەیل داعش کە دەسیان لەتی بوی".

 لەباوەت رەوشەیل ئیسە لەو ناوچەیلە، زێباری دەسنشان ئەوە کرد کە "رەوش ئەمنی لەو ناوچەیلە کە وەرجە یە لەژیر کۆنترۆڵ داعش بۊن هێمان جیگیر نییە و رخبارییگ راسگانی دروس کەێد"، وە دەسنشانکردن ئەوە کە "رێژەیگ گەپ لە دانیشتگەیل رەسەن کە دەربەدەر بۊن وەرەو ناوڕاس عراق و باشووری و هەرێم کوردستان تا ئیسە گلەو نەخواردنە، لە وەختیگ کە ئەو ناوچەیلە ناڵن لە نەوین تەواو ئەرا پرۆسەیل ئاوەدانکردن و بۊین کەلیگ ئەمنی دیار".

 هوشداری دا لە "رخباریەیل رخبار ئەرا گلەوخواردن چاڵاکی داعش، وەتایبەت وەرد کشیانەوەی هیزەیل هاوپەیمان ناودەوڵەتی و جیهیشتن عراق، ئەوەگ هیلێد رێکخستنەگە رخبارییگ راسگانی وەردەوام دروس بکەێد".

 لەباوەت قەزای شنگال، زێباری خەوەر دا کە "رێککەفتنیگ بەسیاگە وە سەرپەرشتی نەتەوە یەکگرتگەیل لە ناوەین هەردوگ حکومەت هەرێم و حکومەت فیدراڵی، ئەرا ئاڵشتکردن ناوچەگە وەرەو ناوچەیگ یاسایی کە بخرێدە ژیر کۆنترۆڵ دامەزراوەیل دەوڵەت، وەلی راسیەگە دەسنشان ئەوە کەێد ئەرا کۆنترۆڵکردن هیزیگ چەکدار نەناسیاگ کە کاروبارەیل وەڕیەو بەێد و بڕیارەیل لە لایەنەیل نادیارەو دەرکەێد".

وتیش کە "ناوچەگە وەبی ئاڵشتکاری لەبان حاڵ خوەی مەنیە، نە ئاوەدان کریاسەو، و نە ئاوارەیل گلەو خواردنە ئەرا ماڵەیلیان".

 رێکخەر ئەرکە ناودەوڵەتییەیل وەردەوام بۊ کە "هەرێم کوردستان لە دیارترین ئەو لایەنەیلە بۊ کە جەنگین و قوربانی دان لە رویوەڕویبۊن تیرۆریستەیل داعش، و هیزەیل پێشمەرگە وە تەواو ئازایەتییگ رویوەڕوی بۊنەوە"، وە دەسنشانکردن ئەوە کە "هەرێمەگە لەی دۊاییە رویوەڕوی فرەترین شمارە لە پەلامارەیل فڕۆکە بی فڕۆکەوانەیل (درۆن) بۊەسەو، لە سای ململانێ هەرێمییەیل، کە لە ناوچەیل ژیر کۆنترۆڵ حکومەت فیدراڵییەو دەس وەپی کەن، ئەوەگ هیشت هاووڵاتییەیل لە کوردستان زەرەدەیل گیانی و ماددی گەپیگ وەخوەیانەو بۊنن".

 زێباری کۆتایی وە قسەیلی هاورد وە ئەوەگ وت "گشت ئی وەرپرسیاریەتییەیلە کەفێدە بان شان حکومەت عراقی، ئەرا جیوەجیکردن ریکارە یاساییە هەوەجەدارەیل و پاراستن وڵاتەگە و هاووڵاتییەیل و هەرێم کوردستان لەو رخباریە گەپەیل".