شەفەق نیوز/ کەمال موسلم وەزیر بازرگانی و پیشەسازی لە هەرێم کوردستان، ئمڕوو پەنجشەممە، راگەیان ئەوەسا حکومەت هەرێم کوردستان پەنا وە هاروردە بەێد تا ئەو کەمیە ک لە بەرهەم گەنم ئی وەرزە پڕەو بکەێد.  

موسلم لە پەراویز سەردانی ئەرا سایلۆی دان لە ناوچەی "پیرە مەگرون" لە پارێزگای سلێمانی ئەرا رووژنامەوانەیل وت: سەنین گەنم لە جفتیارەیل وەشیوەی خاسیگ ریکەێد، و گەنمەگە لە چین خاسیگە، و دووپات کرد ک ئەوەسا هەر بڕیگ لە کشاوەرزەیل وە نرخ ٨٥٠ هەزار دینار ئەرا یەک تەن سینیەێد.  

وتیش: ئمساڵ نیەکەفیمنە گیچەڵ دیرکەفتن شایستەیل دارایی ئەرا جفتیارەیل، وئیسەیش پویل لە هەژمار وەزارەتە دانریاگە، وەیجۊرە: ٥٠٠ مەلیۆن دینار ئەرا پارێزگای هەولێر و دهۆک، و یەک ملیار دینار ئەرا پارێزگای سلێمانی، و هەفتەی بانان پویل فرەیگ دانریەێد، وتیش: ئەگەر هویچ گیچەڵیگ نەکەفت،  ئەوەسا لە کۆتایی هەفتەی ئایندە پویل بەشەو کریەێد.    

موسلم وتیش: بڕ گەنم ئمساڵ بەش خوازین ناوخۆیی نیەکەێد، و وەرپرسەیل بازرگانی عراق ئویشن: رێژەی بەرهەم ئی وەرزە رەسیەسە نیمە وەگورەی وەرز گوزەشتە لەوەر هشکەساڵی، وتیش: دویای زانستن ئەو بڕ گەنمە ک رەسیە دەس، ئەوەسا وە هاوردەی دەیشت کەمیەگە پڕەو کریەێد.