شەفەق نيوز/ وەزارەت تەندروسی لە هەرێم کوردستان، ئمڕوو جمعە، جیوەجیکردن ریکارەیل ئەوپەڕی مقیەتبوین راگەیان، ئەرا نواگیریکردن رخداری تەو خوینوەربوین، ئەوەیش دویای توومارکردن تویشهاتن وە بیماریەگە لە عراق، وتیش؛ بیماریەگە لە بیماریە ڤایرۆسیە هەڵامەت و رخدارەیل دریەێدە قەڵەم.

  وەزارەتەگە لە بەیاننامەیگ رەسیە ئاژانس شەفەق نیوز دووپات کرد لە گرنگی پابەندبوین وە رینمایەیل مقیەتبوینر لە نوایان قەیەغەی سەربڕین ئاژەڵ لەناو ماڵەیل، و تەنیا لە شوینەیل مووڵەتدار فەرمی ری وەوە دریەێد.

وەزارەتەگە دووپاتیش کرد لە گرنگی پابەندبوین قەساوەیل وە پووشین کەرەستەیل مقیەتیکردن کەسی وەتایبەتی دەسکیش و پڕتاڵ مقیەتیکردن، و هەڕەشەی چەسپیان باج سەختیگ لەبان پێشێلکارەیل دا.

 وەزارەتەگە داوای پاک و تەمیسکردن کوشتارگەیل کرد وە دەرمان کلۆر وە ریژەی خەسی 5%، وەگەرد ریکارەیل پاکەوکردن تەواویگ مەوقەی دەسکاریکردن گووشت، و تەنیا لە شوین دڵنیادار بسیننەی، وەگەرد کوڵانن خاسیگ.

تەندروسی داوا لە مەردم کرد پڕتاڵ درویژ و رەنگ کاڵ بپووشن هەناێ لە شوینەیلیگ بوون کە مەلوموور هاناوی، و مرێم و دەرمان دویرخستن مەلوموور وەکار بارن.

  وتیش: گرنگە هەماهەنگی ناوەین فەرمانگەیل تەندروسی و ڤێتێرنەری و کشتوکاڵی بکریەێد ئەرا لەناوبردن (گەنە) و خەسەوکردن هەڵمەتەیل هوشیارکردن لە میدیایەیل راگەیانن، وەگەرد هەڵخەتەیل رشانن دەرمان لە شوینەیل ئیوەتکردن ئاژەڵ، وەگورەی پلانەیل، وەگەرد پابەندبوین تیمەیل تەندروسی وە کەرەستەیل مقیەتیکردن.

     دویەکە پەنجشەممە، وەزارەت تەندروسی عراق، بەرزەوبوین شمارەی بیماریەیل وە تەو خوینوەربوین ئەرا 26 کەس لە وڵاتەگە راگەیان، لەناویان 4 بیمار مردنە.