شەفەق نیوز- هەولێر

وەزارەت ناوخوەیی لە حکومەت هەرێم کوردستان، رووژ چوارشەممە، خەوەردا لە تەواوکردن رێکارەیل تایبەت وە گلەوداین 33 گەنج لە هاووڵاتییەیل هەرێم کوردستان کە لە لیبیا بۊن، و دیاری کرد کە ماوەی هەفتەی ئایەندە گلەو خوەن.

وەزارەتەگە لە بەیاننامەیگ رەسیە ئاژانس شەفەق نیوز، وت کە دۊای رەسین هەواڵەیلیگ لەباوەت دیارنەمان بڕیگ لە هاووڵاتییەیل لە لیبیا، ئەرکدارکردن وەزارەت ناوخوەیی و فەرمانگەی پەیوەندییەیل دەیشت کریا ئەرا گرتنەوەر رێکارەیل و پەلە ئەرا مینەکردنیان و رزگارکردنیان و گلەوداینیان.

زیاتر وت کە گشت مامەڵەیل تایبەت وە 33 هاووڵاتییەگە تەواو کریانە، ئەرا ئامادەکاری گلەوداینیان ئەرا هەرێم کوردستان ماوەی هەفتەی ئایەندە.

حکومەت هەرێم کوردستان جاریگ تر دووپات کرد لە گرنگی وەرگردن هوشیاری لەلایەن گەنجەیل و خیزانەیلیان لە جیوەجیکردن ریەیل کوچ نایاسایی و ناڕێکخستە وەرەو دەوڵەتەیل خوەرئاوایی، و دیاری کرد کە ئی جۊرە لە کوچکردن نەک تەنیا رخداری خەێدە بان ژیانیان، بەڵکم چوودە مدوو پێشێلکردن یاسای دەوڵەتەیل تر و رویوەڕویبوین وەرپرسیاریەتییەیل یاسایی تون.

وتیش کە ئی گەنجەیلە لە ماوەی گوزەشتە رۊوەڕۊ رەوشەیلیگ سەخت بۊنە، کە بەشیگیان ئەرا ماوەی هەشت مانگ لەناو زیندانەیل بۊن، و لە و ماوە تویش رخداریەیل مەرگ بۊنە وە وەردەوامی.

وەزارەتەگە خەوەردا کە تا ئیسە حکومەت هەرێم کوردستان تۊنستگە 302 کووچبەر نایاسایی لە رەوشەیل جیاجیا رزگار بکەێد و گلیان بیەێد ئەرا هەرێم کوردستان، لە وەختیگ وەزارەت ناوخوەیی و فەرمانگەی پەیوەندییەیل دەیشت لە ئیسە رێکارەیل گرنە وەر ئەرا رزگارکردن و گلەوداین 33 کووچبەر، کە بڕیارە ماوەی چەن رووژ کەم ئایەندە بڕەسنە هەرێم کوردستان.