شەفەق نیوز/ نێچیروان بارزانی، سەرۆک هەرێم کوردستان، ئمڕوو چوارشەممە، سوپاس و پیزانین خوەی ئەرا ئیمارات نشان دا، ئەرا ئەو چەودیاریکردن پزیشکییە کە پیشکەشی وە وەزیر ناوخۆی وەرین رەحمەتی کەریم شنگالی کرد، مەوقەی چارەسەرکردنی لەورا، و ئەرا سپۆنسەرکردن کلکردن تەرمەگەی ئەرا کوردستان.
لە بەیاننامەیگ رەسیە ئاژانسی شەفەق نیوز، بارزانی راگەیان "وە ناو خوەم و وەناو خەڵک هەرێم کوردستان سوپاس و پیزانین دڵسووزانە پیشکەش وە جەناب بەڕێز شێخ محمد بن زاید ئال نهەیان سەرۆک میرنشینە یەکگرتگەیل عەرەبی و دادگا و نویسینگەی بەڕێزیان کەم، ئەرا ئەو چەودیاریکردن و گرنگیدان تایبەتە وە رەحمەتی بەڕێز کەریم شنگالی لە ماوەی چارەسەری ئی دویاییە لە ئەبوزەبی".
وتیش: "لەماوەی خەفتن لە خەسەخانە، رەحمەتی چەودیاریکردن پزیشکی بەرز و تەقەلای مرۆیی بەرزیگ لە لایەنە پەیوەندیدارەیلەو وەرگرد، کە هیچ تەقەلایگ نەخستنە پشتدەس لە پیشکەشکردن خاسترین خزمەت وەپی، کە ئیمە فرە سوپاسگوزاریمن و پیزانین ئەرای دیریمن".
بارزانی وتیش: "هەمیش سوپاس و پیزانین قویل خوەم ئەرا ئەوان دیرم ئەرا هەڵوێست بەرز و برایانەیان لە ئەنجامدان کلکردن تەرم رەحمەتی ئەرا میلکان خوەی، یە نشاندانیگ دڵسووزانەس ئەرا ئەو پەیوەندی قویلە و گیان برایەتییە کە گەل کوردستان و سەرکردایەتی و گەل ئیمارات گردەو کەێد، ئسمە ئی هەڵوێست مرۆیی بەخشندە وە نرخیگ فرە بەرز زانیمن، کە لەلایەن خەڵکەو وە قەدرزانی و سوپاسگوزاری مینێدەو لە کوردستان وە مەردم و سەرکردایەتییەگەی”.
هەمیش سوپاس و پیزانین خوەمان ئەرا گشت ئەو پاڵپشتی و هاوکاری وەردەوامە لەلایەن دەوڵەت ئیمارات ئەرا عراق وە گشتی و ئەرا هەرێم کوردستان کەیمن، ئی پشتیوانی دڵسووزانە وەرجەسەی قویلایی ئەو پەیوەندی دووسانە و برایانەس کە هەردوگلا گردەو کەێد.
ئمڕوو لە شار هەولێر مەراسیمیگ فەرمی ئەرا وەرگردن تەرم کەریم شنگالی وەزیر وەرین ناوخۆی هەرێم کوردستان وەڕیەو چگ، لە مەراسیمەگە مەسعود بارزانی سەرۆکی پارت دیموکرات کوردستان، و مەسرور بارزانی سەرۆک حکومەت هەرێم کوردستان وەگەرد شمارەیگ سەرکردەیل پارت دیموکرات کوردستان و کەسایەتییە دیارەیل سیاسی و کۆمەڵایەتی ئامادەبوین.
نێچیروان بارزانی، سەرۆک هەرێم کوردستان، وەرجە پرسەو وەخاکناینی لە قەورسان "پیرمام" لە شار هەولێر، تاجە گوڵینە نادە بان تەرم شنگالی.