شەفەق نیوز/ نێچیروان بارزانی سەرۆک هەرێم کوردستان، ئمڕوو پەنجشەممە، لە دیداریگ وەگەرد ژەنیڕاڵ جوێل فول فەرماندەی گشتی هیزەیل هاوپەیمان ناودەوڵەتی لە عراق و سوریا و شاند یاوەری، باس رەوش ئەمنی و سەربازی لە ناوچەگە و هاوکاری و هەماهەنگی هاوبەش کرد.
سەرۆکایەتی هەرێم کوردستان لە بەیاننامەیگ وت: لە دیدارەگە شۆڕش ئیسماعیل وەزیر کاروبار پیشمەرگە ئامادە بوی، دویای پیشکەشکردن پارچەیگ کار و چالاکیەیل هاوپەیمان ناودەوڵەتی لە ناوچەگە، هەردوگلا هاوڕا بوین لەبان وەردەوامی هەڕەشەی داعش لە عراق و ناوچەگە، و دووپات لە گرنگی هاوکاری و هەماهەنگی هاوپەیمان ناودەوڵەتی وەرد سوپای عراق و پیشمەرگە کردن ئەرا نواگیریکردن ئی هەڕەشە.
وتیش؛ لە بەشیگ ترەک لەی دیدارە، باس دویاترین گامەیل لە کاروبار چاکسازی لەناو وەزارەت پیشمەرگە کریا، و لە باوەتە هەردوگ لایەن دووپات لە گرنگی وەردەوامی لە کارەگە کردن، و پاڵپشتیکردن خوەیان ئەرا گامەیلی نشان دان.
هەمیش لە دیدارەگە باس چەن باوەتەیگ کریا کە پەیوەندی وە رەوشەیل ناوچەگە و باوەتەیلیگ کە گرنگی هاوبەش دیرن.