شەفەق نيوز - هەولێر
نێچیروان بارزانی سەرۆک هەرێم کوردستان، و قاسم ئەعرەجی سڵاکار ئاسایش نەتەوەیی، لە دیداریگیان لە هەولێر، ئمڕوو چوارشەممە، دووپات کرد لەبان جیوەجیکردن رێککەفتن ئەمنی هاوبەش ناوەین عراق و ئیران.
سڵاکاری ئاسایش نەتەوەیی لە بەیاننامەیگ وت: لە دیدارەگە باس پەیوەندییەیل ناوەین بەغداد و هەولێر و شیوەیل پاڵپشتیکردن هاوکاری و هەماهەنگی کریا، ئەرا چگن وەرەو شکانن ئەو ریگریەیلە کە کە نوتحیڵی لە چارەسەرکردن باوەتەیل گیرهاتگ کەن، وەگورەی بەرژەوەنی باڵای نیشتمانی.
لە دیدارەگە باس دویاترین نووەوبویەل لە ئاست ناوچەگە کریا، و دووپاتکردن لەبان گرنگی یەکخستن هەڵوێستەیل لەڕوی سەختیەیل، و دووپاتکردن لەبان جیوەجیکردن رێککەفتن ئەمنی هاوبەش ناوەین عراق و کۆمار ئیسلامی ئیران، کە تایبەتمەنە وە کۆنتڕۆڵکردن سنوور.
بەیانامەگە وتیش: لە دیدارەگە باس هەڵوێست عراقی و تورکی کریا لەباوەت بڕیار پەکەکە وە پویچەڵکردن حزبەگە، و هەماهەنگی وەرد حکومەت هەرێم لەی باوەتە.
لە کۆتاێێ دیدارەگە، دووپات لەبان وەردەوامی پەیوەندیکردن و هەماهەنگی ناوەین هەولێر و بەغدا کریا وەگورەی شایستەیل گامەیل هاتگ، وەشیوەیگ ئاسایش و ئارامی وەردەوامیگ دابین بکەێد.
لەلای خوەییش، سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: سەرۆک نێچیروان بارزانی و ئەعرەجی باس دویاترین نووەوبویەل لە رەوش ئەمنی لە عراق کردن، و دووپات کردن لە گرنگی وەردەوامی هەماهەنگی و هاوکاری ناوەین سوپای عراق و پیشمەرگە و ئەو هیزەیل ئەمنی، هەمیش هەردوگ لایەن باس تەقەلا و گامەیل پرس ئاشتی لە تورکیا کردن.
لەلاییگ ترەک، رووشنایی خریا بان رەوشەیل و نووەوبویەیل ناوچەی خوەرھەڵات ناوڕاس، و کاریگەریی لەبان دەوڵەتەیل ناوچەگە، و دووپات لە وەردەوامی لە خاوەندارێتی سیاسەتەیلیگ کردن وە ئامانج دویرخستن عراق و ناوچەگە لە قەیران و جەنگەیل، و کارکردن ئەرا پەیاکردن چارەیلیگ مقیەتیکردن ئاسایش و ئارامی مسۆگەر بکەن.
باوەت ئاسایش سنوور و چەن باوەتیگ ئەمنی ترەک بەشیگ بوین لەو دیدارە کە وەزیر ناوخۆی هەرێم کوردستانیش ئامادەی بوی.
وە ئەرکدارکردن لەلایەن محمد شیاع سودانی سەرۆک وەزیرەیل عراق، قاسم ئەعرەجی سڵاکار ئاسایش نەتەوەیی شەوەکی ئمڕوو رەسیە هەولێر پایتەخت هەرێم کوردستان، ئەرا ئەنجامدان زەنجرەیگ لە دیدارەیل سیاسی و ئەمنی وەگەرد سەرکردەیل لە هەرێم کوردستان.