شەفەق نیوز/ سەرۆک هەرێم کوردستان نێچیروان بارزانی و ئەمیندار گشتی رێکخریاگ "بەدر" هادی عامری، ئمڕوو چوارشەممە، دووپاتکردن لەبان هەوەجەکەێد  چارەسەرکردن گیچەڵ و دۆسیەیل هەڵپەسێردراوەیل ناوەین هەولێر و بەغدا "وە گیانیگ هاوکاری و هاوبەشی نیشتیمانی" بوود.

لە بەیاننامەیگ هاتیە هەردووگ لا لە دیدارەگەیان گفتوگو کردن لەبان دویا پیشهاتەیل سیاسی و بارودۆخ گشتی وڵاتەگە، وەگەرد دۆسیە هاوبەشەیل ناوەین حکومەت فیدڕاڵی و هەرێم کوردستان و پەیوەنیەیلیان، کە خزمەت وە بەرژەوەنی نیشتیمانی بکەێد.

وەپای بەیاننامەگە هەردووگ لا دووپاتکردن لەبان گرنگی ئەوزەڵداین وە گفتوگو و لەیەکفامسن لەناوەین گشت لایەنەیل عراق و هاوکاری هاوبەش ئەرا مسۆگەرکردن سەقامگیری وڵات چارەسەرکردن دۆسیەیل هەڵپەسێردراوەیل وە گیانیگ هاوکاری و هاوبەشی نیشتیمانی.

هەمیش، گفتوگوکردن لەباوەت بارودۆخ وڵات و گرنگی پاراستن یەکرزی نیشتمانی  و رویوەرویبوینەوە ئاڵنکاریەیل هەرێمی و ناودەوڵەتی.

سەرۆک بارزانی دووپاتکرد لەبان گرنگیدان هەرێم کوردستان لە وەردەوامی هەماهەنگی و دەسمیەتی وەرد گشت هازەیل نیشتیمانی لە عراق، دووپاتکرد لەبان هەوەجە پاڵپشتیکردن تەقەلای حکومەت فیدڕاڵی لە بەرقەرارکردن ئاسایش و سەقامگیری و ئەوزەڵداین وە یەکڕزی نیشتیمانی، کە لە بەرژەوەنی وڵاتەگەس.