شەفەق نیوز/ نێچیروان بارزانی سەرۆک هەرێم کوردستان، ئمڕوو چوارشەممە، پیشوازی لە شاندیگ دیبلۆماسی و سەربازی ئەمریکی پایەبەرزیگ کرد ک وەسەرۆکایەتی دینا سترۆڵ خانمە جیگر وەزیر وەرگری ئەمریکا ئەرا باوەتەیل خوەرهەڵات ناوڕاس هاتنە دیداری.
هەرلە ماسیۆ تولەر باڵوێز ئه‌مريكا لەلای عراق، ماسیۆ ترولینجەر جیگر وەڕیەوبەر باوەتەیل سیاسی و سەربازی لە هیزەیل هاوبەش ئەمریکا لە خوەرهەڵات ناوڕاس، و بڕیگ لە وەرپرسەیل سیاسی و سەربازی لەناو شاندەگە بوین.
سەرۆکایەتی هەرێم کوردستان لە بەیاننامیگ رەسیە ئاژانس شەفەق نیوز وت: لە سەرەتای دیدارەگە سترۆڵ دووپات لە نووڕین سیاسی ئەمرکا وەپابەندبوین لە وەردەوامی پاڵپشتی سیاسی و سەربازی ئەرا عراق و هەرێم کوردستان کرد، و ئەرزشدار قوربانیەیل هیزەیل پێشمەرگە لە جەنگ دژوە ریخریاگ داعش کرد.
لەلای خوەییش، سەرۆک نێچیروان بارزانی دووارەی سوپاس ورێزی ئەرا پێشکەشکردن پاڵپشتی و هاوکاری لەلایەن ئەمریکا و هاوپەیمان ناودەڵەتی ئەرا عراق و هەرێم کوردستان لە نواگردن تیرۆر کرد.
بەیاننامەگە وتیش: هەردوگ لایەنەگە لەبان گرنگی ئەو گامەیلە ڕێک کەفتن ک پێکاتەیل عراق ئەرا دەرچگن لە قەیران سیاسی لە وڵاتەگە دانەن، و هاتن حکومەتیگ نووڕین هاووڵاتیەیل وەپی جیوەجی بکەێد، و دووپات لە گرنگی یەکگردن و یەکڕزی لایەنەیل کوردستانی کردن، و لەی چوارچیوە هەمیش دووپات کریا لەبان وەردەوامی گفتوگۆ کردن ئەرا چارەکردن باوەتەیل گیرهاتگ ناوبەین هەولێر و بەغداد.
لە لاییگ تر، دیدارەگە باس جۊلە و پەلامارەیل داعش لە ناوچەیلیگ جیاجیا لە عراق و سوریا وە هەڕەشیگ راسی کرد، و هەمیش هەردو لایەنەگە دووپات لە گرنگی هاوکاری و هەماهەنگی ناوبەین پێشمەرگە و سوپای عراق کردن تا پاڵپشتیکردن هاوپەیمان ناودەڵەتی وەدەس بارن ئەرا نواگردن ئی مەترسیەیلە، و ئەرا لەناوبردن داعش وە تەواوی ک هەڕەشەی ئاشتی و ئارامی عراق و ناوچەگە دەێد.