شەفەق نیوز/ نێچیروان بارزانی سەرۆک هەرێم کوردستان، ئمڕوو سێشەممە، چەوی کەفتە سیناتۆر ئەمریکی ناسریاگ لینزی گراهام وشاند یاوەری.  

شانەدەگە هەرلە ئەلێنا رومانووسکی خانمە باڵیۆز ئەمریکا لە عراق، و ژەنیڕاڵ جۆن برینان فەرماندەی هیزەیل هاوپەیمان ناودەوڵەتی، وبڕیگ لە دیبلۆماسی وگەورە ئەفسەرەیل ئەمریکی لەناوی بوی.  سەرۆکایەتی هەرێم کوردستان لە بەیاننامیگ رەسیە ئاژانس شەفەق نیوز وت: لە دیدارەگە باس رەوشەیل عراق وکار سیاسی لە وڵاتەگە کریا، وهەمیش دویاترین گەشەیل جەنگ لەبان تیرۆر، و پەیوەندیەیل هەولێر-بەغداد، و گفتوگۆ ئەرا چارەی گرفتەیل ناوبەینیان، و رەوشەیل سوریا وباوەت کورد لەناوی.     

بەیاننامەگە وتیش: هەردوگ لایەن دووپات لە گرنگی مقەیەتیکردن ئاسایش وئارامی لەناوچەگە کردن، وهاوڕابوین ک مەترسی گلەوخواردن داعش هەڕەشەیگ راسییە لەبان ئاسایش و ئارامی عراق وسوريا، وگرنگە ئەرا نواگردن ئی مەترسیە، مقەیەتی ئاسایش و ئارامی ناوچەگە بکریەێد، و گشت لایەنەیل زوور تەقەلایان بارنە بان ئی چینە. 

سەرۆک نێچیروان بارزانی دووپات کرد ک کلیل ئارامی و چارەکردن گرفتەیل عراق هالە چارەکردن گرفتەیل هەولێر- بەغداد لەڕی گفتوگۆ و لەبنەمای دەستوور.   

پەیوەندیەیل عراق و هەرێم کوردستان وەگەرد دەوڵەتەیل هاوسا ودەوڵەتەیل ناوچەگە، دویاترین نووەبویەیل لە ناوچەگە وەشیوەی گشتی،  بڕیگ باوەت ک گرنگی هاوبەش دیرن، تەوەرەیل باسکردن ئەو دیدارە بوین.