شەفەق نیوز/ عەبدوللەتیف جماڵ رەشید سەرۆک کۆمار، و نێچیروان بارزانی سەرۆک هەرێم کوردستان، ئمڕوو دووشەممە، باس پەیوەندییەیل ناوەین بەغداد و هەولێر کردن، و دووپات لەبان گرنگی چارەکردن باوەتەیل گیرهاتگ و مووچەی فەرمانبەرەیل هەرێم کوردستان کردن.
سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: رەشید لە کۆشک بەغداد پیشوازی لە نێچیروان بارزانی سەرۆک هەرێم کوردستان و شاند یاوەری کرد، و باس نووەوبویەل رەوشەیل سیاسی و ئەمنی و ئابووری لە مەیدان ناوخوەیی و هەرێمی کریا، هەمیش پەیوەندییەیل ناوەین حکومت فیدڕاڵی و حکومەت هەرێم کوردستان.
سەرۆک کۆمار باس گرنگی پشبەسان وە بنەمای گفتوگۆ ناوەین دوو لایەن و وەپشتسەرنان خاڵەیل ناکۆکی کرد، وەگورەی یاسا و دەستور و پەسەنکردن بەرژەوەنی هاوڵاتیەیل، و دابینکردن مووچەی فەرمانبەر و خانەنشینەیل هەرێم وەک هەکاتی برایلیان لەو ناوچەیلە عراق، و لە خود وەختەگە دووپات کرد لەبان پشتگیریکردنی لە دروسکردن پەیوەندییەیل قایم ناوەین حکومەت فیدراڵی و حکومەت هەرێم کوردستان.
هەمیش سەرۆک کۆمار دووپات لەبان گرنگی سەردانکردن ناوەین حکومەت فیدراڵی و حکومەت هەرێم کوردستان کرد ئەرا رەسین وە لەیەکفامسنن هاوبەش، و قایمکردن بنەمایل گفتوگۆی بیناکەر و کارا ناوەین دوو لایەن، ئەرا یەکلاییکردن باوەتەیل جی ناکۆکی، و مسۆگەرکردن بەرژەوەنی گشت هاوڵاتیەیل، و باس گرنگی هاوکاری و هەماهەنگی لەناوەین دوو لایەن کرد، وەخاتر کاریگەریی راستەوخۆی لەبان چارەکردن باوەتەیل هاوبەش و زوورکردن لەبان پڕۆژەیل بیناکردن و ئاوەدانکردن و ئەوزەڵکردن لە وڵات.
لەلای خوەییش؛ نێچیروان بارزانی سەرۆک هەرێم کوردستان دووبات کرد کە رەسین وە چارەسەری لە بلوەت مووچەی فەرمانبەرەیل هەرێم کوردستان و لەیەکفامسنن ئیسە دەسمیەتی دەێد لە قایمکردن پەیوەندییەیل ناوەین حکومەت فیدراڵی و حکومەت هەرێم کوردستان، و تەقەلایل چارەکردن ئەو باوەتەیل گیرهاتگ وەرەو نوا بەێد، و سوپاس لە سەرۆک کۆمار کرد ئەرا گرنگیدان و وەشوینکەفتن و رکداریی ئەرا چەسپانن بنەمایل پەیوەندی بەرهەمدار ناوەین بەغداد و هەولێر وەشیوەیگ سوودی باێدە بان گشت عراقیەیل.