لە بەیاننامەیگ سەرۆکایەتی هەرێم رسیە ئاژانس شەفەق نیوز هاتیە، بارزانی ئمڕوو لە هەولێر وەگەرد سەرۆک ئەرمینیا گردەوبوی وە ئامادەبوین جیگیر سەرۆک هەرێم و وەزیرەیل پەیوەنیدار لە حکومەت کوردستان، هەردوگلا گفتوگوکردن لە پەیوەنیەیل نیوان ئەرمینیا و عراق و هەرێم کوردستان وە تایوەت مژار ئابووری و ئاڵشتکردن هویروڕا لەباوەت بارودۆخ عراق و هەرێم و بارودۆخ پێکهاتەیل.
هەردوو لا دووپاتکردن لەبان دەرفەت ئەوزەڵداین وە پەیوەنیەیل ئەرمینیا وەگەرد عراق و هەرێم کوردستان لە کەرتەیل بازرگانی و وەبەرهێنان و کەرت تایوەت و پزشکی و گەشتوگوزار، هەمیش رووشنایی خستنە بان دەرفەت گەشتکردن ئاسمانی وەشیوەی راستەوخوەی لەناوەین ئەرمینیا و عراق لەناویشی هەرێم کوردستان.
لە بەیاننامەگە دیاریکرد، سەرۆک ئەرمینیا رووژ دووشەممەی وەرین رەسیە ئەرا بەغدا و وەگەرد گەورە وەرپرسەیل عراقی کووەوبویە، و شەوەکی ئمڕوو پەنجشەممە رەسیە هەولێر وەلایەن سەرۆک هەرێم نێچیروان بارزانی پیشوازی لەلی کریا.