شەفەق نیوز/ نێچیروان بارزانی سەرۆک هەرێم کوردستان، ئمڕوو یەکشەممە، لە میونخ ئەڵمانیا، لە دویاترین چەوپیکەفتنی، وەگەرد نیلس ئان وەزیر دەوڵەت ئەڵمانی ئەرا کاروبار هاوکاری ئابووری و گەشەپیدان گردەو بوی.
سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: لە دیدارەگە باس هاوکاری ئابووری و پڕۆژەیل ئەڵمانیا لە چین ئەوزەڵکردن لە عراق و هەرێم کوردستان کریا، و دووپات لە گرنگی جیگربوین سیاسی و ئابووری لە عراق کریا وەخاتر ئەوە ک ئەڵمانیا بتوەنێد پڕۆژەیلیگ زیاتر و خاستر جیوەجی بکەێد.
بەیاننامەگە وتیش: هەردوگ لایەنەگە باس رەوش سیاسی و ئەمنی لە عراق کردن، و باس رێککەفتن حکومەت هەرێم وەگەرد حکومەت فیدڕاڵی لە گونجانن رەوشەیل لە شنگال کردن.
وەزیر دەوڵەت ئەڵمانی دووپات کرد ک جیگربوین رەوشەیل ئەمنی لە شنگال گرنگە تا ئەڵمانیا بتوەنێد دەسمیەتی پیشکەش بکەێد و پڕۆژەیلیگ زیاتر لەورا جیوەجی بکەێد.
بەیاننامەگە وتیش: جەنگ دژوە تیرۆر و نواگردن مەترسیەیل داعش تایبەت لە ناوچەیل ١٤٠ و رەوشەیل لە سوریا و ناوچەگە وەگشتی باوەتەیل ناو ئەو گردەوبوینە بوین.