شەفەق نیوز/ نێچیروان بارزانی سەرۆک هەرێم کوردستان، ئمڕوو سێشەممە، چەوی کەفتە بڕیگ لە سەرکردە و سەرۆک دەوڵەتەیل لەناو بارەگای وەڕیوچگن لویتکەی کۆنفرانس نەتەوە یەکگرتگەیل ئەرا کەشوهەوا COP29 لە ئازەربایجان.
لەناو ئەوەانەگ سەرۆک نێچیروان بارزانی چەوی کەفتە لییان، رەجەب تەیب ئەردۆگان سەرۆک تورکیا، و هاکان فیدان وەزیر دەیشت تورکیا، و محمد بن زاید ئال نهەیان سەرۆک دەوڵەت ئیمارات.
سەرۆک هەرێم وەگەرد شاند عراق ئەرا ئازەربایجان گردەو بوی، کە عەبدوللەتیف جماڵ رەشید سەرۆکایەتیی کەێد.
ئیوارەی دویەکە دووشەممە، نێچیروان بارزانی سەرۆک هەرێم کوردستان رەسیە شار باکو، پایتەخت ئازەربایجان، ئەرا بەشداریکردن لە کۆنفرانس ئاڵشتبویەیل کەشوهەوا.
وەرجەیە، دڵشاد شەهاب قسەکەر سەرۆکایەتی هەرێم کوردستانر وت: نێچیروان بارزانی سەرۆک هەرێم کوردستان ئەوەسا وە مکیسیگ فەرمی لەلایەن ئیلهام عەلیێف سەرۆک ئازەربایجان، سەردان ئازەربایجان کەێد، ئەرا ئامادەبوین لە کۆنفرانس نەتەوە یەکگرتگەیل ئەرا کەشوهەوا COP24.
شەهاب لە بەیاننامەیگ رەسیە ئاژانس شەفەق نیوز وت: ئەوەسا نێچیروان بارزانی وەگەرد سەرکردەیل جەهان، بەشداری لە رسوومەیل وازکردن ئەو کۆنفرانسە کەێد کە باس سەختیەیل ژینگە و گیچەڵ و دەرئەنجامەیل ئاڵشتبوین کەشوهەوا کەێد.
لە گرنگترین باوەتەیل دانوسەنین ئی کۆنفرانسە، سپۆنسەرکردن وزەی پاک جویر جیگریگ ئەرا وزەی نەفتی، و کەمەوکردن تەکان زەرەدبەخش، و بەرزکردن توانای کۆمەڵگایل ئەرا نواگیریکردن سەختیەیل ژینگە، ئەوەیش لەسای بەرزەوبوین دیاردەیل ویرانکەر کەشوهەوا.
کۆنفرانسەگە بوودە دەرفەت گرنگیگ ئەرا دەوڵەتەیل تا پلان کار نیشتمانییان پیشکەش بکەن لەباوەت کەشوهەوا وەگورەی رێککەفن پاریس، کە بڕیارە لە سەرتای ساڵ ٢٠٢٥ بوود، ئەگەر ئی پلانەیلە وەشیوەی راسیگ جیوەجی کریان، ریگری لە پلەی گەرمی جەهانی کەێد لە رەدکردن ١.٥ پلەی سەدی لەبان ئاست وەرجە پیشەسازی.
ساڵانە کۆنفرانس لایەنەیل وەڕیەو چوود، و سەرۆکایەتیی کەفێدە ناوەین ئەو پەنج ناوچە وەنۆڕە کە نەتەوە یەکگرتگەیل دیارییان کردگە.
ئمساڵ ئازەربایجان پەسەن کریا ئەرا سەرۆکایەتی کۆنفرانس بیس و نۆهەم لایەنەیل (COP29)، کە لە باکو وەڕیەو چوود، کە باکو میژوویگ پڕ لە میوانداریکردن رویداوەیل ناودەوڵەتی دیرێد.