شەفەق نیوز/ نێچیروان بارزانی سەرۆک هەرێم کوردستان، و زەکەریا یابجی ئۆغڵو سەرۆک حزب "هودابار" تورکی، ئمڕوو چوارشەممە، دووپات لە وەردەوامی تەقەلا ئەرا سەرکەفتن کار ئاشتی لە تورکیا کردن.

سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: بارزانی لە پەراویز کۆڕبەند هەولێر سێیەم، پیشوازی لە زەکەریا یابجی ئۆغڵو ئەندام پەرلەمان تورکیا و سەرۆک حزب "هودابار" و شاند یاوەری کرد، و لە دیدارەگە باس تەقەلایل کاروبار ئاشتی لە تورکیا کردن.

هەردوگ لایەن دووپات لە گرنگی وەردەوامی لە تەقەلایل ئەرا سەرکەفتن ئی پرسە کردن، و دووپات کردن کە چەک و تونەڕەوی چارەسەر هویچ باوەتیگ نیەکەن.

سەرۆک هەرێم کوردستان، دووارە دووپات کرد کە هەرێم کوردستان ئامادەس ئەرا پیشکەشکردن هەر پشتگیرییگ گرنگ ئەرا وەنوابردن پرس ئاشتی، و رۆڵی پاڵپشتیکەر و دەسمیەتیدەرە.

بەیاننامەگە وتیش: لە دیدارەگە باس چالاکییەیل حزب هودابار کریا و رۆڵ ئەندامەیلی لە پەرلەمان و ژیان سیاسی لە تورکیا، وەگەرد باسکردن لە رەوشەیل سیاسی لە ناوچەگە.