سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت:  لە دیدارەگە دویاترین پیشهاتەیل رەوش سیاسی عراق و پەیوەندییەیل ناوەین هەولێر و بەغدا لە ژیر رووشنایی دویاترین پیشهاتەیل و ڕێککەفتن ناوەین حکومەت هەرێم کوردستان و حکومەت فیدراڵی لەباوەت مووچە، و رەوش ناوخۆی هەرێم و هەڵوژاردن پەرلەمان کوردستان کریا.

لە دیدارەگە دووپات لە گرنگی چارەسەرکردن کێشەیل ناوەین هەولێر و بەغدا کریا ئەرا مقیتیکردن ئارامی و سەقامگیری سیاسی وڵات، و گرنگی هاوکاری و هەماهەنگی ناوەین لایەنە سیاسییەیل عراق و تەقەلا و دیالۆگ وەردەوام.

وەگورەی بەیاننامەگە، دیدارەیل سەرۆک هەرێم کوردستان لە بەغدا و پەیوەندییەیل ئەمریکا وەرد عراق و ناوچەگە و بەرنامەی سەردان سەرۆک وەزیرەیل عراق ئەرا واشنتۆنیش باسەیل ناو دیدارەگە بوین.

لە دیداریگ ترەک، لە مەوقەی سەردانەگەی ئەرا بەغدا، نێچیروان بارزانی وەگەرد پاتریک دورێل باڵیۆز فەرەنسا لە عراق گردەو بوی و باس لە رەوش عراق و هەرێم کوردستان و پەیوەندییەیل ناوەین هەولێر و بەغدا و هەڵوژاردن پەرلەمان کوردستان کردن.

هەرلیوا، وەشیویگ ئەرێنی هەڵسەنگاندن ئەرا دویاترین پیشهاتەیل پەیوەندییەیل ناوەین حکومەت هەرێم کوردستان و حکومەت فیدراڵی کردن، و دووپات لەبان گرنگی لەیەکفامستن و چارەسەرکردن کێشەیل ناوەین هەردووگلا کریا.

 لە دیدارەگە پەیوەندییەیل فەرەنسا وەرد عراق و هەرێم کوردستان و سەردان سەرۆک هەرێم کوردستان ئەرا بەغدا و دیدارەیلی وەرد وەرپرسەیل باڵای عراق تاوتوێ کریا.