شەفەق نیوز/ نێچیروان بارزانی سەرۆک هەرێم کوردستان، ئمڕوو چوارشەممە، پیشوازی لە ئیلینا رۆمانوسکی خانمە باڵیۆز ئەمریکا لە عراق و شاند دیبلۆماسی و سەربازی یاوەری کرد.
سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: هەردوگ لایەنەگە لە گردەوبوینیان باس دویاترین گەشەیل سیاسی لە عراق و دروسکردن حکومەت نوو عراق کردن، و دووپات لە گرنگی دیاریکردن یەکەمینەیل کار حکومەت عراق کردن ئەرا چارەکردن گرفتەیل، و هاوڕا بوین ک دروسکردن حکومەت نوو عراق جویر دەرفەتیگە ئەرا چارەکردن گرفتەیل و توەنێد کار ئەرا وەدەسهاوردن ئاسایش و ئارامی وڵاتەگە بکەێد، ک لەبان ئارامی ناوچەگە وەگشتی شکیەێدەو.
بەیاننامەگە وتیش: هەردوگ لایەنەگە زوور لەبان گرنگی پەیوەندەیل هاوسەنگی عراق وەرد دەوڵەتەیل ناوچەگە کردن، و هاوڕا بوێن ک حکومەت نوو عراق دەرفەت هاندان بەرهەمهاوردن دیرێد، و لە زەمینەسازی و کیشانن سەرمایەیل و کەرت تایبەت و بیگانە ئەرا بەشداریکردن لە گەشەدان وڵاتەگە.
پەیوەندیەیل ئەمریکا وەرد عراق و هەرێم کوردستان باوەتیگ لەناو ئەو دیدارە بوی ک خانمە باڵیۆز ئەمریکا دووپات لە بتەوکردن پەیوەندیەیل ئەمریکا وەرد عراق و هەرێم کوردستان کرد، و رووشنایی خستە بان کارەیل چاکسازی و دووارە رێکخستن پیشمەرگە، و پاڵپشتیکردن وڵاتەگەی ئەرا سەرکەفتنی.
گرفتەیل هەولێر-بەغداد و گفتوگۆ و تەقەلایل ئەرا چارەکردنیان، گرنگی چارەکردن گرفت نەفت و گاز، رەوشەیل ناو هەرێم کوردستان، گرنگی ئارامکردن ژاوەژاو، ئاڵشبوین کەشوهەوا، چاکسازی ئابووری، رەوشەیل ناوچەگە وەگشتی، و چەن باوەتەیگ ک لەلای هەردوگ لایەنەگە گرنگە قسە وباس ئەو دیدارە بوین ک قونسوڵ گشتی ئەمریکا لە هەرێم کوردستان، و وەرپرس نویسینگەی عراق لە وەزارەت دەرەوەی ئەمریکا ئامادەی بوین.