شەفەق نیوز/ نێچیروان بارزانی سەرۆک هەرێم کوردستان، ئمڕوو چوارشەممە، دووارە هوشداری کرد ک ریخریاگ داعش هیمان مەترسییگ راسی دیرێد هەڕەشەی عراق و سوریا و ناوچەگە وەگشتی، ئەوروپایش دەێد.
نویسینگەی راگەیانن بارزانی لە بەیاننامەیگ رەسیە ئاژانس شەفەق نیوز وت: سەرۆک هەرێم کوردستان، دویای نیمەڕو ئمڕوو، پیشوازی لە شاندیگ لە دەسەی وەرگری لە پەرلەمان ئەڵمانیا کرد وە سەرۆکایەتی سارا نانی، ک بڕیگ لە پەرلەمانتارەیل جویراجویر حزبەیل لە پەرلەمان ئەڵمانیا لەناوی بوی.
لە گردەوبوینەگە باس پەیوەندیەیل ئەڵمانیا وەگەرد عراق و هەرێم کوردستان کریا، و هەمیش درویژکردن مەنین هیزیەیل ئەڵمانیا لەناو هاوپەیمان ناودەوڵەتی لە عراق و هەرێم کوردستان لەلایەن پەرلەمان، و مەترسیەیل داعش و رەوشەیل ناوچەگە وەگشتی.
بارزانی ئی سەردانە جویر پاڵپشتیکردن ئەرا هەرێم کوردستان و عراق دادە قەڵەم، و سوپاس لە پەرلەمان و حکومەت و گەل ئەڵمانیا کرد ئەرا مووڵەتداین وە هیزەیل وڵاتیان لە عراق و هەرێم کوردستان، و دووزرە سوپاس هەرێم کوردستان ئەرا ئەو پاڵپشتیکردن سەربازی و مرۆیی ئەڵمانیە لەماوەی جەنگ دژوە داعش.
بارزانی وتیش: داعش هیمان مەترسییگ راسی دیرێد هەڕەشەی ئاسایش و ئارامی عراق و سوریا و ناوچەگە وەگشتی دەێد، باوجی هەڕەشەی ئەوروپایش دەێد.
سەرۆک هەرێم کوردستان، هەمیش باس هاوکاری و هەماهەنگی ناوبەین هیزەیل پیشمەرگە و سوپای عراق وە خاس کرد، و نووڕێد ک گرنگە قایمیان بکریەێد.
لەباوەت رەوش عراق، بارزانی باس ئومیدی کرد ک حکومەت نوو وەی نزیکە دروس بوود، و جیوەجکەر خوازینەیل هاووڵاتیەیل عراق بووس، و ئاسایش و ئارامی وەدەس بارێد، و بتوەنێد چارەسەر گرفتەیلی وەرد هەرێم کوردستان لەبنەمای دەستوور بکەێد، و دووپات لەبان گرنگی رەسین پیکاتەیل ئەرا ئەرا شیوەی وەیەکەوژیان لە عراق کرد.
لەلای خوەییش، وەگەرد دەسخوەشی لەو گەشەیلە لە هەرێم کوردستان، شاند ئەڵمانیا دووپات لە وەردەوامی پاڵپشتیکردن وڵاتەگەی ئەرا عراق و هەرێم کوردستان کرد، و نشان ریزگردنی ئەرا رۆل پیشمەرگە لە شکستهاوردن داعش دا، و ئارەزوو وڵاتەگەی لە بتەوکردن پەیوەندیەیل وەرد عراق و هەرێم کوردستان لە گشت چینەیل نشان دا.
دیدارەگە هەمیش باس رەوشەیل ناوخوەیی هەرێم کوردستان کریا، و دووارە رێکخستن هیزەیل پیشمەرگە، و دویاترین نووەوبویەیل لە جەنگ ئۆکرانیا و کاریگەریی لەبان ئەوروپا وە تایبەت لە چین وزە، و هەمیش باس مەترسی ئاڵشتبوین کەشوهەوا و کاریگەریی لەبان عراق کریا، وەگەرد بڕیگ لەو باوەتەیلە ک لەلای هەردوگ لایەنەگە گرنگە.