شەفەق نیوز/ نێچیروان بارزانی سەرۆک هەرێم کوردستان، لە پیشوازیکردن وە خانمە یاوەر وەزیر دەرەوەی ئەمریکا، ئمڕوو چوارشەممە، چارەکردن گرفتەیل هەولێر- بەغداد و یاسایلیگ ئەرا بەشەوکردن داهاتەیل نەفت وگاز جویر کلیلی ئەرا چارەکردن گرفتەیل عراق و چەسپیان ئاسایش و ئارامی لە وڵاتەگە ، و جەخت کرد ک عراق وەخاتر چارەکردن گرفتەیلی، گفتوگۆ وەیەکڕەسینەوە ناوبەین لایەنەیل سیاسی وپیکاتەیل خوازێد، هەمیش دەسمیەتی دەوڵەتەیل برادەر.
سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز: بارزانی، ئمڕوو چوارشەممە، پیشوازی لە باربارا لیڤ خانمە یاوەر وەزیر دەرەوەی ئەمریکا ئەرا باوەتەیل خوەرهەڵات ناوڕاس و شاند یاوەری کرد.
بەیاننامەگە وتیش: لە گردەوبوینیگ ئەلینا رۆمانوسکی خانمە باڵیۆز ئەمریکا لە عراق و قونسڵ گشتی ئەمریکا لە هەرێم کوردستان و شمارەیگ لە دیبلۆماتیکارەیل ئەمریکی ئامادەی بوین، باس پەیوەندیەیل ئەمریکا وەرد عراق و هەرێم کوردستان و دویاترین گەشەیل رەوش سیاسی لە عراق و تەقەلایل ئەرا پشتسەرنان سەختیەیل، پەیوەندیەیل هەولێر- بەغداد و گرفتەیل گیرهاتگ ناوبەینیان کریا.
بەیاننامەگە وتیش: لیڤ خان سڵاو سەرۆک ئەمریکا جۆن بایدن و وەزیر دەرەوەی ئەمریکا ئەرا نێچیروان بارزانی سەرۆک هەرێم کوردستان رەسان، دیاری کرد ک خوەی هاتیەسە ئیلا تا دووپات لە پابەندی ئەمریکا بکەێد لە پەیوەندیەیلی وەگەرد عراق و هەرێم کوردستان، و وەگرنگی نووڕنە ئی پەیوەندیەیلە، و دووپات لە پاڵپشتیکردن تەواویان ئەرا چەسپیان ئاسایش و ئارامی سیاسی لە عراق کرد.
بەیاننامەگە وتیش: بارزانی لەلای خوەییش، وەگەرد سوپار و رێز ئەرا دەسمیەتی و پاڵپشتی ئەمریکا ئەرا عراق و هەرێم کوردستان، دووارە دووپات لەوە کرد ک گرفتەیل عراق وە پشتگووشخستن هویچ هیزیگ یا لایەنیگ سیاسی نیەکریەێد، و بایەتە پیکاتەیل عراق وە گفتوگۆ و لەیەکڕەسنەوە بڕەسنە شیوەی پێکەوەژیان.
بەیاننامەگە وتیش: بارزانی گرفتەیل هەولێر- بەغداد و هەسی یاسایل بەشەوکردن داهاتەیل نەفت وگاز جویر کلیلی ئەرا چارەکردن گرفتەیل عراق و چەسپیان ئاسایش و ئارامی لە وڵاتەگە دانا، و جەخت کرد ک عراق وەخاتر چارەکردن گرفتەیلی، گفتوگۆ وەیەکڕەسینەوە ناوبەین لایەنەیل سیاسی وپیکاتەیل خوازێد، هەمیش دەسمیەتی دەوڵەتەیل برادەر.
پەیوەندیەیل عراق و هەرێم کوردستان وەگەرد دەوڵەتەیل هاوسا، رەوشەیل ناوخوەیی هەرێم کوردستان و گرنگی یەکڕزی لایەنەیل کوردستانی، رەوشەیل ناوچەگە وەگشتی،و بڕیگ باوەت ک گرنگییان هاوبەشە، باوەتەیلیگ لەناو ئەو گردەوبوینە بوین.