شەفەق نیوز/ نێچیروان بارزانی سەرۆک هەرێم کوردستان، ئمڕوو شەممە، دووپات کرد ک مقەیەتیکردن ئازادی و دەسکەفتەیل راپەڕین و مافەیل دەستووری هەرێم کوردستان ئەرک و وەرپرسایەتی گشت کوردستانیەیلە.
بارزانی لە بەیاننامیگ لە ٣١مین ساڵیان راپەڕین ئادار ١٩٩١،.ک رەسیە ئاژانس شەفەق نیوز وت: راپەڕینەگە باسکردنیگ لە ئارەزوو و باوەڕ و خوازین قۊل گەل کوردستان بۊ ئەرا ژیان و دۊارووژیگ خاستر پڕ لە ئازادی و سەربەرزی و رەتکردن ستەم، و جەخت کرد ک راپەڕین بەرهمیگ لە خەبات و قوربانیەیل پێشمەرگە و گەل و جەماوەر راپەڕین و یەکڕزی لایەنە سیاسیەیلە و پێکاتەیل کوردستان بۊ.
بارزانی وتیش: راپەڕین دەروازەی گەل کوردستان بۊ ک وازە لەبان قۆناغ نوویگ لە ئیدارەی سەروەخوەی و دامەزرانن دامەزراوەیل شەرعی و فەرمی هەرێم کوردستان، ک دۊای ئازادکردن عراق لەناو دەستوور چەسپیا و بڕیار دریا، و لەناو و لەجەهان دەیشت وەشیوەیگ فەرمی رەفتار وەگەردی کریا.
بارزانی دووپات کرد ک؛ مقەیەتیکردن ئازادی و دەسکەفتەیل راپەڕین و مافەیل دەستووری هەرێم کوردستان ئەرک و وەرپرسایەتی هاوبەشە ئەرا گشت کوردستانیەیلە، و ئەوەیش وەفاداری ئەرا گیان پاک شەهیدەیل و گشت قوربانیەیل ری ئازادی نشان دەێد.
بارزانی داوا کرد ساڵیاد راپەڕین بوودە هاندەریگ ئەرامان تا زیاتر هەس دووسی و یەکگردن و یەکڕزی و قۊلکردن پێکەوەژیان و ئەوەکە قبووکردن و خوەشبۊن قۊلەو بکەێد، و کارکردن وەخاتر ئەو ئامانجەیلە ک شەهیدەیل راپەڕین و گشت شەهیدەیل کوردستان گیانیان ئەرای کردنە قوربانی.