شەفەق نیوز/ نێچیروان بارزانی سەرۆک هەرێم کوردستان، وەبوونەی رووژ جیهانی ژن، کە کەفێدە هەشت ئادار، گەرمترین پیرووزبایی ئەرا گشت ژنەیل کوردستان و عراق و جیهان پیشکەش کرد، ئومید پیشکەفتن و سەرکەفتن زیاتر لە تەقەلایلیان ئەرا وەدەسهاوردن دادپەروەری و یەکسانی ئەرایان خوازێد.
بارزانی لە بەیاننامەیگ رەسیە ئاژانس شەفەق نیوز دووپات کرد لە پاڵپشتیکردن تەواو هەرێم کوردستان، ئەرا رۆڵ کاریگەر ژن لە بیناکردن کۆمەڵگەیگ زیاتر ئازاد و دادپەروەر و پیشکەفتگ.
وتیش: وەدرویژایی میژوو، ژن لە کوردستان ئامادەبوین و ئازایی و خوەیڕاگریی لە گۆڕەپانەیل خەبات سیاسی و وەرخودان و گشت شوینەیل ژیان چەسپان، و هەر بەشیگ بویە لە ریڕەوی ئازادیخواز کوردستان کە لەلی جیاوە نیەوود، و ئمڕوویش لە رۆڵ خوەی وەردەوامە لە سیاسەت و ئابووری و ئیدارە و پەروەردە، و وە کارایی لە گشت چینەیل ژیان بەشداری کەێد.
بارزانی وتیش: ئیمە شانازی وە پایە و دەسکەفتەیل ژن کوردستانی کەیمن، و زانیمنیش کار گشتگیر زیاتر خوازێد ئەرا مسۆگەرکردن مافەیلی و مقیەتیکردنی لە تونەڕەوی و دووچەوەکی، و قایمکردن پایەی لە گشت کەرتەیل.
بارزانی وتیش: نەهیشتن تونوتیژی وەبان ژن، و مقیەتیکردن مافەیلی، و دابینکردن ژینگەیگ کە بەشداریکردن یەکسانی لە گشت چینەیل ژیان بکەێد، ئەوە وەرپرسایەتی گشتییە، و دووپات کرد کە ئی وەرپرسایەتیە کەفێدە مل تاکە کەسەیل و خیزانەیل و مەردم و دامودەزگایەیل.
لە کۆتایی بەیاننامەگەی، نێچیروان بارزانی دووپات لە پابەندبوین هەمیشەیی کرد وە پتەوکردن کەلتوور وەیەکەوژیان و وەخشین و یەکسانی، دیاری کرد کە بیناکردن کۆمەڵگەیگ دیموکرات پیشکەفتگ وەبی مسۆگەرکردن ماف و ئازادیەیل ژن و پاڵپشتیکردن رۆڵ و پایەی لە گشت چینەیل نیەکریەێد.
هەمیش سڵاو لە گشت ژنە خەباتکارەیل ئەرا مافەیل خوەیان کرد، و ئەرا گیان قوربانیەیل تونوتیژی، و دووپات کرد کە شکۆمەندی ئەرا رووژ جیهانی ژن.