لەو دیدارە کە هەرلە باڵیۆز و قونسوڵ گشتی بەریتانیا لە عراق و هەرێم کوردستان ئامادەی بوین، باس لە دویاترین نووەوبویەیل جەنگ دژوە تیرۆر، و نواگردن رخەیل ریخریاگ داعش، و هەڵوژاردن، و رەوش ناوخوەیی هەرێم کوردستان، و پەیوەندیەیل هەولێر و بەغدا، و کووچبردن نایاسایی وەرەو بەریتانیا، و نواگیری ماددەیل هووشبەری کریا.
هەردوگ لایەنەگە دووپات لە گرنگی هاوکاری هاوبەش ناوەین بەریتانیا و هەرێم کوردستان و عراق کریا، ئەرا کەمەوکردن کووچبەری نایاسایی، و تاوان ریخریاگ، و رێک کەفتن کە هاوکاری گرنگە ئەرا لەناوداین هووشبەری، ئەراوە، بایەسە گامەیل خوازیاگ جیوەجی بکریەێد، و لەی باوەتە باس یادداشت لەیەکفامستن کریا کە ئەوەسا ناوەین حکومەت هەرێم کوردستان و حکومەت بەریتانیا واژوو کریەێد.
لەباوەت رەوشەیل ناوخوەیی لە هەرێم کوردستان، هەردوگ لایەنەگە هاوڕا بوین لەبان گرنگی قایمکردن یەکێتی هەڵوێست و یەکڕزی ناوخوەیی و جیوەجیکردن هەڵوژاردن.
لەباوەت هەڵوژاردن، نێچیروان بارزانی دووپات کرد کە هەرێم کوردستان پابەندە وە جیوەجیکردن هەڵوژاردن و شەرعیەت هەرێم کوردستان لە هەڵوژاردن تیەێد.
لە تەوەریگ ترەک لە دیدارەگە، باس رەوش ناوچەگە وەگشتی کریا.
هەرلیوا، سەرۆک نێچیروان بارزانی چەوی کەفتە مارک سترۆ قونسوڵ گشتی نوو ئەمریکا لە هەرێم کوردستان، و پیشوازی لە هاتنی کرد، و ئومید خوەی ئەرا سەرکەفتن و گشت پاڵپشتیکردنیگ ئەرا سەرکەفتنیگ لە ئەرکەیلی نشان دا.
سەرۆک بارزانی دووپات لە ئارەزوو هەرێم کوردستان لە گەشەپیدان پەیوەندیەیلی وەگەرد ئەمریکا کرد.
لەلای خوەییش، وەگەرد نشاندان خوەشهاڵیی وە دەسەوکاربوینی وە ئەرکەیل نووی، قونسوڵ گشتی ئەمریکا دووپات لە پابەندبوین وڵاتەگەی ئەرا گەشەپیدان پەیوەندیەیلی وەگەرد هەرێم کوردستان و قایمکردن هاوکاری هاوبەش ناوەین هەردوگلا کرد.
رەوشەیل ناوچەگە وەشیوەی گشتی، وەگەرد بڕیگ باوەت خاوەن گرنگی لەلای هەردوگ لایەنەگە باسەیل ناو ئەو دیدارە بوین، وەگورەی بەیاننامەیگ سەرۆکایەتی.