شەفەق نیوز/ نێچیروان بارزانی سەرۆک هەرێم کوردستان، ئمڕوو چوارشەممە، باس لە سوپاس خوەی کرد ئەرا ئەو دەور سەرەکیە ک بەریتانيا لە دەرکردن بڕیار ئاسایش ناودەوڵەتی ئەنجامدا لە دروسکردن پەنای ئارام لە سنوور هەرێم کوردستان لە سەرەتای نەوەتەیل سەدەی گوزەیشتە، و هووشداری لە زەرەدەیل ئی هشکەساڵیە ک هەرێم کوردستان و عراق کەفێدە وەری، و هەمیش پابەندی هەرێم کوردستان وە بڕیارەیل ناودەوڵەتی لە ژینگەپارێزی لە ئاڵشتبوین کەشوهەوا دووپات کرد.
سەرۆک بارزانی لە کۆنگرەیگ رۆژنامەوانی وەگەرد دومینیک رای وەزیری دەرەوەی بەریتانيا لە شار هەولێر و ئاژانس شەفەق نیوز ئامادەی بوی وت: چەن باوەتیگ وەگەرد وەزیرەگە باس کردیمن لەلیان گەشەکردن پەیوەندیە دووانیەکان، و ناکۆکیەیل و باوەتەیل گیرهاتگ لەناوبەین هەولێر و بەغداد و تەقەلایل چارەکردنیان، و جەنگ دژوە ریخریاگ داعش و مەترسیەیل گلەوخواردنی، و رەوشەیل ناوچەگە وەگشتی و هەمیش باوەتەیلیگ تر.
وتیش؛ بەریتانیا وەگەرد دەوڵەتەیلیگ تر خاوەن دەور سەرەکی بوین لە دروسکردن پەنای ئارام لە ساڵ ١٩٩١، و دووپات کرد ک بیناکردن ئی پەنا کام نوویگ بوی ئەرا هەرێم کوردستان، و لەو وەختەو تا ئیسە پەیوەندیەیلمان وەگەرد بەریتانیا لە گشت چینەیل وەردەوام بوی، و لە جەنگەی دژوە ریخریاگ داعش زیاتر گەشە کردن
سەرۆک بارزانی هەمیش وت: هەرێم کوردستان و عراق وەگشتی وەدەرکەفتن ڤایڕۆس کۆڕۆنا کاریگەر بوی، ک زەرەدەیلیگ ئابووری گەورەیگ دا، و دووپات کرد م ئەرا خاسەوکردن ئابووری ئەرا قۆناغ دویای کۆڕۆنا ئیمە هاوکاری و پشتگردن گشتی خوازیمن.
وتیش؛ ئیسە زیان لە هشکەساڵی و کاریگەریەیل خراو لە جەنگ داعش وەخوەمان دوینیمن، و جەخت کرد ک هەرێم کوردستان پابەندە وە بڕیارە ناودەوڵەتیەیل ک پەیوەندی وە بڕیارە ناودەوڵەتیەیل و ژینگەپارێزی دیرن.
لەلای خوەییش وەزیر دەرەوەی بەریتانا وت: سەردانەگەم ئەرا عراق و هەرێم کوردستان لە چوارچێوەی گرنگی پەیوەندیەیەیل دووانی تیەێد، وتیش؛ ئیمە برادەر گەل کوردیمن، و مەزەنە کەم ک پەیوەندیەیلیگ مێژووی دیریمن و چەن سەختییگ کەفتە نوامان.
هەمیش وت: مەزەنە کەم ک هەرێم کوردستان توانای نواگردن مەترسیەیل ریخریاگ داعش دیرێد.
وەزیرە بەریتانیەگە وتیش؛ باس لە ئاسایش و ئارامی عراق و هەرێم کوردستان کردیمن، و ئەوەسا بەریتانيا لە پابەندیی و پەیمانەیلی وەرانوەر عراق وەردەوام بوود.
وەزیرەگە باس تەرخانکردن پویل ئەرا پاڵپشتیکردن هێزەیل پێشمەرگە ئاشکرا کرد.
وتیش؛ وەگەرد سەرۆک بارزانی باس لە دەور راگەیانن ئازاد و ئازادی را کردیمن، و هەمیش باس لە باوەتەیل پەروەردە و ئاڵشتبوین کەشوهەوا کریا .وەزیرە بەریتانیەگە مکیس سەرۆک هەرێم کوردستان ئەرا سەردان لەندەن پایتەخت کرد، وتیش؛ ئومیدخوازیمن وەی نزیکە لەورا چەومان وەپی بکەفێد.