شەفەق نیوز/ نێچیروان بارزانی سەرۆک هەرێم کوردستان، ئمڕوو چوارشەممە، پیشوازی لە میتیا لیسکوفار باڵوێز فاتیکان لەلای عراق کرد، دویای دەسکردنی وە ئەرکەیلی، ک ئەرا یەکەم جارە سەردان کوردستان کەێد.

دویای پیشوازیکردنی، سەرۆک هەرێم پیرووزبایی ئەرا دەسکردنی وە کارەگەی کرد، و ئومید سەرکەفتن ئەرای خوازێد، ودووپات کرد ک کوردستان وەگرنگی نووڕێدە پەیوەندیەل وەرد فاتیکان، و لە خود وەختەگە باس سەردانەگەی پاپا ئەرا عراق و هەرێم کوردستان وە رووداویگ میژووی کرد، و باس لە ئومید خوەی کرد ک ئی سەردانە بوودە هاندەریگ ئەرا گلەوخواردن مەسیحیەگان ئەرا وڵات خوەیان، ک لەوەر جەنگەیل و توندڕەوی ساڵەیل گوزەیستە شمارەی فرەیگ لەلیان لە عراق دەرچگن، وەگورەی بەیاننامەیگ سەرۆکایەتی.

سەرۆک بارزانی، وازکردن زانکۆی کاسۆلیکی لە ناحیەی عنکاوە لە هەولێر وەگام گرنگ و خاسیگ دانا، ودووپات کرد ک پەروەردە خوەی سەنگ بنەڕەتی و سەرەکیە ئەرا کۆمەڵگا، ئەراوە بایەدە ئی چینە گرنگییگ لە خاسی خوەنەواری وەربگرێد، و بوودە پوڵیگ ئەرا پەیوەندیەیل و پێکەوەژیان و یەک قبووڵکردن.

لەلای خوەییش؛ باڵوێز فاتیکان لە عراق سوپاس و دەسخوەشی خوەی لە هەرێم کوردستان کرد لە وازکردن دەریلی ئەرا ئاوارە مەسیحیەکان وەگەرد ئەو ئاوارەیل عراق، و نشان دا ک فاتیکان وەگرنگی  و رێزو سوپاس  نووڕێدە ئی هەڵوێستە، و ئەرا کەلتوور پێکەوەژیان و ئەواکە قبووڵکردن لە هەرێم کوردستان، وسوپاس و دەسخوەشی لە سەرۆک نێچیروان بارزانی کرد، و لە وەرپرسەیل هەرێم کوردستان لە پیشوازیکردنە گەرمەگەی هەرێم ئەرا پاپای فاتیکان.

لەلای خوەییش، سەرۆک بارزانی نشانەی ئەو دەورە کرد ک مەسیحیەیل عراق و کوردستان راننەی، و دیاری کرد ک مەسیحیەیل پێکهاتەی سەرەکیین لە هەرێم کوردستان، و خاوەن دەور دیاریگ بوینە لە خزمەت و بیناکردن و گەشەکردن کوردستان، و لە دەستور کوردستان ک دیرن ئامادەی کەن ئەوەسا مەقەیەتی مافەیل مەسیحیەیل و گشت ئەو پێکهاتە ئاینی و نەتەویەکان کریەێد.

رەوشەیل هاماری نەینەوا، و رەشەیل ئاوارەیل لە هەرێم کوردستان، وکارەیل ڤایڕۆس کۆرۆنا، و هەڵمەت واکسینەگە، و پەیوەندیەیل ناوبەین هەولێر و بەغداد، و هەڵبژاردنەگە و رەوشەیل عراق وەگشتی و سەختیەیلی، و چەن باوەتیگ تر، لەناو ئەو کۆبونەوە ک شاندیگ کلیسەیی لەناوی بوی باس کریا.