شەفەق نیوز/ نێچیروان بارزانی سەرۆک هەرێم کوردستان، ئمڕوو چوارشەممە، دووپات لە ئارەزوو هەرێم کوردستان ئەرا چارەکردن گرفتەیل و باوەتەیل گیرهاتگ ناوبەین هەولێر و بەغدا کرد، ئەوەیش وەڕی دانوسەنین وە لەبنەمای دەستوور.
ئەوەیش لە چەوپیکەفتن شاندیگ دیبلۆماسی و سەربازی ئەمریکی پایەبەرزیگ وە سەرۆکایەتی ماسیۆ تولەر باڵیۆز ئەمریکا لەلای عراق.
سەرۆکایەتی هەرێم کوردستان لە بەیاننامیگ ئمڕوو وت: لە دیدارەگە باس دۊاترین گەشەیل کار سیاسی، و رەوش ئەمنی لە عراق، و مەترسیەیل گلەوخواردن داعش لە عراق و سوریا، و پەیوەندیەیل ئەمریکا وەگەرد عراق و هەرێم کوردستان، وبڕیارەیل فیدراڵی عراق لەباوەت کەرت نەفت و گاز لە هەرێم کوردستان، و چاکسازی لە وەزارەت پێشمەرگە، و رەوش ناوخۆیی لە هەرێم کوردستان کریا.
لەلای خوەییش، لایەن ئەمریکا دووراە دووپات لە پابەندی وڵاتەگەی وە وەقایمکردن پەیوەندیەیل وەگەرد عراق و هه‌رێم کوردستان کرد، و دووپاتیش لە گرنگی هاوکاری هاوبەش وەگەردیان، و هەماهەنگی و هاوکاری ناوبەین پێشمەرگە و سوپای عراق ئەرا نواگردن ریخریاگ داعش کرد.
وەگورەی بەیاننامەگە، هەردوگ لایەنەگە رێک کەفتن لەبان رێککەفن و یەکڕزی لایەنەیل سیاسی لە هەرێم کوردستان لە بەغداد ک پاڵپشتی پایەی هەرێم کوردستان بکەێد، و مقەیەتی بەرژەوەنیی وەشیوەیگ خاستر بکەێد.
لەلای خوەییش، سەرۆک نێچیروان بارزانی وت: یەک چینیگ لە سڕبۊن سیاسی لە عراق هەس، و تا ئیسە ئەو لەیەکڕەسینەوەی سیاسیە ک کار سیاسی وەرەو نوا بوەێد وەدەس نەکفتیە، باوجی فرە گرنگە ک گشت لایەنەیل سیاسی عراق بزانن ک دەرفەت ئەرا راسەوکردن ری کار سیاسی هیمان هەس.