شەفەق نیوز/ نێچیروان بارزانی سەرۆک هەرێم کوردستان، ئمڕوو یەکشەممە، پیشوازی لە ژەنیڕاڵ ماسیۆ مکفارلان فەرماندەی گشتی هیزەیل هاوپەیمان ناودەوڵەتی لە عراق و سوریا کرد.
سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: لە دیدارەگە باس دویاترین گەشەیل ئەمنی و هەڕەشەیل تیرۆر ونواگردن داعش لە عراق و سوریا کریا، هەمیش دویاترین یاداشت ک بینتاگۆن وەگەرد عراق و هەرێم کوردستان واژووی کرد، و چاکسازی لە وەزارەت پیشمەرگە و دووارە ڕێکخستن هیزەیل پیشمەرگە.
هەردوگ لایەنەگە زوور لەبان گرنگی وەردەوامی پاڵپشتیکردن لەلایەن هاوپەیمان ناودەوڵەتی ئەرا عراق و هەرێم کوردستان کردن تا لەناوبردن یەکجاری داعش و قورتاربوین لە مەترسی وهەڕەشەی لەبان ئاسایش و ئارامی عراق و سوریا و ناوچەگە وە گشتی هاوڕا بوین.
لەی باوەتە، ژەنیڕال مکفارلان دووپات لە پابەندی هاوپەیمان ناودەوڵەتی لە وەردەوامی پاڵپشتیکردن عراق و هەرێم کوردستان لە جەنگ دژوە تیرۆر کرد، و رای هەردوگ لایەنەگە ئەوە بوی ک هاوکاری و هەماهەنگی ناوبەین سوپای عراق و پیشمەرگە لە نواگردن داعش گرنگە.
رەوشەیل ناو هەرێم کوردستان، دویاترین نووەوبویەیل کار سیاسی و هەڵوژاردن سەرۆک کۆمار عراق و ئەرکدارکردن سەرۆک وەزیرەیل ئەرا دروسکردن کابینەی نوو حکومەت فیدراڵی عراق، نووترین گەشەیل لە ناوچەگە وە گشتی، وەگەرد باوەتەیلیگتر لەلای هەردوگ لایەنەگە گرنگە، باسەیل ناو ئەو دیدارە بوین ک وەزیر پیشمەرگە لە حکومەت هەرێم کوردستان و قونسوڵ گشتی ئەمریکا لە هەرێم کوردستان ئامادەی بوین.